पणजी : राजकारणामध्ये राजकीय नेत्यांना फारसा वेळ मिळत नाही, असे म्हटले जाते. मात्र गोव्यातील अनेक राजकीय नेते, आमदार वेळात-वेळ काढून आपल्या कला जोपासताना दिसत आहेत.
मयेचे आमदार प्रेमेंद्र शेट हे तर पारंपरिक मूर्तिकार घराण्यात जन्माला आलेले असल्याने ते गणेशमूर्ती बनवतात आणि मूर्तीचे रंगकामही करतात. तर प्रियोळचे आमदार गोविंद गावडे हे एक चांगले नाट्यकलाकार आहेतच पण त्याच सोबत चांगले रंगकर्मी आहेत.
दरवर्षी ते आमरखाणे केरी प्रियोळ येथील नंदा केरकर यांच्या गणेशमूर्ती चित्र शाळेत जाऊन तेथील गणेशमूर्ती रंगवतात. यावर्षीही ते गणेशमूर्तीना रंगवत आहेत. नंदा केरकर यांना गोविंद गावडे यांनी चिखल मळणे, रंककाम करणे यासाठी यंत्रे व अवजारे उपलब्ध करून दिली आहेत.
मयेचे आमदार प्रेमेंद्र शेट यांचे कुटुंब अनेक वर्षांपासून मूर्ती बनवतात. त्यांचे मोठे बंधू माजी सभापती अनंत शेट हे सुद्धा चिकणमातीच्या गणेश मूर्ती बनवतात. दरवर्षीप्रमाणे यावर्षीही प्रेमेंद्र शेट यांनी आपल्या चित्रशाळेत काही गणेशमूर्ती केल्या आहेत. व काहीना रंगही दिला आहे. मूर्तीशाळांतील कारागिर मूर्तीशाळेत कामात मन झाले आहेत.
