पणजी : पुढारी वृत्तसेवा
बलात्काराच्या पोलिस तपासासाठी तब्बल दोन महिने कुटुंबापासून 'अपना घर'मध्ये निवास करावा लागलेल्या १४ वर्षीय पीडित मुलीला तिच्या बाळासह कुटुंबीयांकडे स्वाधीन करण्याची सूचना मुंबई उच्च न्यायालयाच्या गोवा खंडपीठाने देत याचिका निकाली काढली. या प्रकरणाला जबाबदार असलेल्या संशयिताला पोलिसांनी अटक केली आहे.
मुंबई उच्च न्यायालयाच्या गोवा खंडपीठाच्या मार्गदर्शनानंतर आणि महाधिवक्त्यांच्या सूचनेनुसार उत्तर गोवा बाल कल्याण समितीने (सीडब्ल्यूसी) पीडितेला कुटुंबीयांकडे स्वाधीन करण्याचा निर्णय घेतला.
मुलीवर बलात्कार झाल्यानंतर ती गर्भवती राहिली होती. उपचारासाठी सरकारी इस्पितळात गेली असता स्वच्छतागृहात बाळाला जन्म दिल्याने हे प्रकरण समोर आले होते. या घटनेप्रकरणी पोलिसांनी अज्ञात व्यक्तीविरुद्ध गुन्हा दाखल करून तपास सुरू केला होता. या प्रकरणाचा तपास पूर्ण झाला असून संबंधित संशयिताला अटक करण्यात आली आहे.
