Goa Mandovi bridge accident
पणजी, पुढारी वृत्तसेवा : मांडवी पुलावर आज (दि. २६) पहाटेच्या सुमारास झालेल्या भीषण अपघातात दुचाकीवरील दोघांचा मृत्यू झाला. महाराष्ट्रात नोंदणीकृत दुचाकीने टॅक्सीला धडक दिल्याने ही दुर्घटना घडली. कुशाग्र पटाळे ( २१, रा. मुंबई), यश मालिक सिंग (२०, हरियाणा) अशी अपघातात ठार झालेल्या विद्यार्थींची नावे आहेत. दोघेही सांकवाळ येथील कायदा महाविद्यालयाचे विद्यार्थी होते.
मिळालेल्या माहितीनुसार, कुशाग्र आणि यश हे सांकवाळ येथील कायदा महाविद्यालयाचे विद्यार्थी होते. पहाटे ३ ते ३.१५ वाजण्याच्या सुमारास ते दुचाकीवरुन मांडवी पुलावरुन जात होते. यावेळी त्‍यांच्‍या दुचाकीची टॅक्सीला धडक बसली. ही धडक एवढी भीषण होती की, दोघा तरुणांचा जागीच मृत्यू झाला.
दुचाकीने टॅक्सीला दिलेल्‍या धडकीत दुचाकीवरील दोघां तरुणांचा जागीच मृत्यू झाला. तर चालकासह टॅक्‍सीमधील प्रवासी किरकोळ जखमी झाले. सर्व जखमींना उपचारासाठी गोवा वैद्यकीय महाविद्यालय (जीएमसी) रुग्णालयात दाखल करण्यात आले आहे. या अपघाताचा पुढील तपास पोरवोरिम पोलीस करीत आहेत.
कुशाग्र पटाळे हा मुंबईतील रहिवासी होता. तर यश मालिक सिंग हा मूळचा हरियाणतील होता. दोघेही गोव्‍यातील कायदा महाविद्यालयात शिक्षण घेत होते. त्‍यांच्‍या अपघाती मृत्‍यूने कुटुंबावर दु:खाचा डोंगर कोसळला आहे.
