पणजी : पुढारी वृत्तसेवा
समुद्रकिनाऱ्यावरील भटक्या कुत्र्यांना दत्तक घेण्यासाठी पर्यटन खात्याने नागरिक, प्राणी कल्याण संस्था आणि श्वानप्रेमींना सात दिवसांची मुदत दिली आहे. या कालावधीत दत्तक न घेतलेल्या कुत्र्यांची नसबंदी व लसीकरण करून त्यांना अधिकृत प्राणी निवारागृहात स्थलांतरित केले जाणार आहे, अशी माहिती पर्यटन संचालक केदार नाईक यांनी दिली.
समुद्रकिनाऱ्यावरील भटक्या कुत्र्यांना पकडणे आणि त्यांचे स्थलांतर करणे ही कारवाई कायद्यानुसार तसेच सर्वोच्च न्यायालयाच्या निर्देशांनुसार केली जाईल. दत्तक घेऊ इच्छिणाऱ्यांनी पत्त्याचा पुरावा सादर करणे, दत्तक घेण्यात येणाऱ्या कुत्र्यांची संख्या नमूद करणे आणि त्यांच्या आहार, काळजी व निवाऱ्याची जबाबदारी स्वीकारण्याचे हमीपत्र देणे आवश्यक आहे.
सर्वोच्च न्यायालयाच्या स्वयंप्रेरित रिट याचिकेतील निर्देशानुसार समुद्रकिनाऱ्यांचे संरक्षित जागांमध्ये वर्गीकरण करून भटक्या प्राण्यांच्या व्यवस्थापनासाठी कठोर नियम लागू करण्याच्या पार्श्वभूमीवर हा निर्णय घेण्यात आला आहे.
कासावली, कोलवा, अंजुना आणि वागातोर यांसारख्या लोकप्रिय किनाऱ्यांवर भटक्या कुत्र्यांचे हल्ले आणि त्यांच्यामुळे होणारे रस्ते अपघातांबाबत चिंता व्यक्त केली जात आहे. केंद्रीय आरोग्य मंत्रालयाने संसदेय उत्तरात दिलेल्या माहितीनुसार, २०२२ ते २०२५ या काळात गोव्यातील किनारपट्टी भागात कुтра चावण्याच्या ३७,१९७ घटनांची नोंद झाली आहे. सात दिवसांची मुदत संपल्यानंतर पर्यटन खाते दत्तक न घेतलेल्या कुत्र्यांना पकडून त्यांची नसबंदी व लसीकरण करणार आहे.
