पणजी : पुढारी वृत्तसेवा
कांदोळी येथील कथित बेकायदा डोंगर कापणी आणि बांधकाम प्रकरणाची गोवा खंडपीठाने गंभीर दखल घेतली आहे. दाखल केलेल्या जनहित याचिकेवर सुनावणी करताना बांधकामांशी संबंधित असलेल्या सलमान खानसह राज्य सरकारी खात्यांना नोटिसा बजावून त्यांची भूमिका स्पष्ट करण्याचे आदेश दिले.
सलमान खान खंडपीठाने गंभीर याचिकेनुसार, कांदोळी परिसरात मोठ्या प्रमाणावर डोंगर कापणी करून विकासकामे होत असून, पर्यावरणीय तसेच नियोजनविषयक नियमांचे उल्लंघन झाल्याचा आरोप करण्यात आला आहे.
संबंधित प्रकल्पाचा संबंध अभिनेता सलमान खान भागीदार असलेल्या एका कंपनीशी असल्याचा दावाही याचिकेत केला आहे. याचिकेत किनारपट्टी नियमन क्षेत्र (सीआरझेड) नियम, पर्यावरण संरक्षण कायदे तसेच शहर व नगर नियोजन (टीसीपी) नियमांचे उल्लंघन झाल्याचा मुद्दा उपस्थित करण्यात आला आहे.
याचिकेनुसार, कांदोळी येथील सर्व्हे क्रमांक ८२/१-एफ मधील जागा सीआरझेड-३ क्षेत्रातील १०० मीटरच्या 'नो डेव्हलपमेंट झोन'मध्ये येत असतानाही तेथे निवासी व्हिला आणि अन्य बांधकाम करण्यात आल्याचा आरोप करण्यात आला आहे.
अभिनेता सलमान खान मॅनेजिंग पार्टनर असलेल्या क्लासिक सिटी इन्व्हेस्टमेंट्स प्रायव्हेट लिमिटेड या कंपनीमार्फत पर्यावरणीय आणि सीआरझेड नियमांचे उल्लंघन करून विकासकामे करण्यात आल्याचा दावा याचिकेत केला आहे.
पालन न करताच हा दाखला जारी केल्याचा आरोप
याचिकेनुसार, बांधकाम सिंकेरी नदीच्या भरतीरेषेपासून ५५ मीटर अंतरावर झाले असून ते सीआरझेड नियमांचे स्पष्ट उल्लंघन असल्याचा आरोप आहे. या ठिकाणी निवासी व्हिला आणि स्विमिंग पूल उभारण्यात आल्याचेही याचिकेत नमूद करण्यात आले आहे.
कांदोळी ग्रामपंचायतीने ३० एप्रिल २०२५ रोजी दिलेल्या भोगवटा प्रमाणपत्रालाही (ऑक्युपन्सी सर्टिफिकेट) याचिकेत आव्हान देण्यात आले. मंजुरीपेक्षा अधिक बांधकाम झाल्याचा व आवश्यक नियमांचे पालन न करताच हा दाखला जारी केल्याचा आरोप केला आहे.
