पणजी : पुढारी वृत्तसेवा
रस्ते वाहतुकीवरील ताण कमी करण्यासाठी राज्य सरकारने जलमार्गाच्या प्रवासाला प्रोत्साहन देण्यासाठी गोव्यात जल मेट्रो सेवा सुरू - करण्याचा महत्त्वाकांक्षी प्रकल्पाला गती देण्याचा प्रयत्न केला आहे.
त्यासाठीचा सविस्तर प्रकल्प अहवाल (डीपीआर) तातडीने तयार करण्याच्या सूचना केंद्राने सरकारला दिल्या आहेत. राज्यात ही जल मेट्रो सेवा सुरू झाल्यास पणजी ते हळदोणे, पणजी ते साखळी, पणजी ते सावर्डे, पणजी ते तेरेखोल या जलमार्गाचा समावेश होऊ शकतो.
या प्रकल्पाच्या पाठपुराव्यासाठी नदीपरिवहन मंत्री सुभाष फळदेसाई व खात्याचे संचालक विक्रमसिंह राजे भोसले यांनी दिल्लीत केंद्रीय बंदरे, नौवहन व जलमार्ग मंत्री सर्वानंद सोनोवाल यांची भेट घेऊन चर्चा केली.
काही दिवसांपूर्वी मुख्यमंत्र्यांनीही यासंदर्भात सोनोवाल यांच्याकडे चर्चा केली होती. केंद्रीय मंत्री सोनोवाल यांच्याशी झालेल्या या बैठकीत मंत्री फळदेसाई यांनी आर्थिक सहाय्य मिळण्यासंदर्भात चर्चा केली. या प्रकल्पाचा डीपीआर लवकरात लवकर करून पाठवा अशा सूचना त्यांनी फळदेसाई यांनी केल्या आहेत.
