पणजी : पुढारी वृत्तसेवा
गोव्यातील सर्पदंशाची आकडेवारी आणि सर्पदंशानंतर होणारी मानवी मृत्यूची संख्या निश्चितच भयावह आहे. पावसाळ्यात तर सर्पदंशाचे प्रमाण अधिक पाहायला मिळते. दिवसाला साधारणपणे दोन सर्पदंशाच्या घटना घडतात. गोमेकॉ (जीएमसी) च्या अभ्यासातील आकडेवारीनुसार २०२० ते २०२४ या कालावधीत गोव्यात सर्पदंशाच्या १,६६३ घटना आणि ३० जणांच्या मृत्यूंची नोंद झाली आहे.
यावरून, सर्पदंशाच्या घटनांमुळे निर्माण होणारे सार्वजनिक आरोग्याचे आव्हान कायम असल्याचे दिसून येते. झाली आहे. यावरून, सर्पदंशाच्या घटनांमुळे निर्माण होणारे सार्वजनिक आरोग्याचे आव्हान कायम असल्याचे न्यायवैद्यकशास्त्र विभागातील डॉ. चेतन कारेकर आणि डॉ. पूर्वी मिशाळ यांनी 'द अकॅडमिक' या आंतरराष्ट्रीय जर्नलमध्ये प्रकाशित केलेल्या संशोधनानुसार, पावसाळ्यात सर्पदंशाच्या घटनांमध्ये लक्षणीय वाढ होते.
संशोधकांनी नोंदवले की २१ ते ३० वयोगटातील तरुण हा सर्वाधिक प्रभावित गट होता, तर एकूण प्रकरणांमध्ये पुरुषांचे प्रमाण अधिक होते. संशोधनानुसार, सर्पदंशाच्या बहुतेक घटना ग्रामीण आणि वनक्षेत्रात घडल्या.
तथापि, शहरी प्रकरणांमध्येही वाढ दिसून आली आहे. तज्ज्ञांच्या मते, ही वाढ वेगाने होणारे बांधकाम आणि जंगलतोड यामुळे होणाऱ्या अधिवासाच्या विनाशाला कारणीभूत आहे. अभ्यासानुसार, गोव्यात दरवर्षी ५०० ते ६०० सर्पदंशाच्या घटनांची नोंद होते आणि पावसाळ्यात दररोज सरासरी जवळपास दोन घटना घडतात. ही आकडेवारी एका व्यापक राष्ट्रीय चिंतेचे प्रतिबिंब आहे, कारण जगातील सर्पदंशाच्या एकूण घटनांमध्ये भारताचा मोठा वाटा आहे.
