पणजी : पुढारी वृत्तसेवा
डिजिटल अरेस्ट घोटाळा प्रकरणांत गोव्यातील तीन रहिवाशांनी अलीकडेच तीन वेगवेगळ्या प्रकरणांत एकत्रितपणे १.७४ कोटी रुपयांपेक्षा जास्त रक्कम गमावली आहे. सासष्टीमधील वेळ्ळी येथील एका ८४ वर्षीय ज्येष्ठ नागरिकाने सुमारे ८० लाख रुपये गमावले, तर सत्तरीतील वाळपई येथील एका ६७ वर्षीय सेवानिवृत्त कर्मचाऱ्याने ५० लाखांहून अधिक रुपये गमावले.
दुसऱ्या एका प्रकरणात, सासष्टीमधील नावेली येथील एका ४४ वर्षीय गृहिणीने या घोटाळ्यात ४४ लाखांहून अधिक रुपये गमावले. रायबंदर येथील सायबर गुन्हे पोलिसांनी अलिकडेच या प्रकरणी एफआयआर नोंदवले असून, ते या प्रकरणाचा पुढील तपास करत आहेत.
फसवणूक करणाऱ्यांनी आपण सायबर विभागाचे पोलिस असल्याचे भासवले व पीडितांना खोट्या गुन्हेगारी प्रकरणांमध्ये अटक करण्याची धमकी दिली. घाबरवण्यासाठी बनावट वॉरंट, व्हिडिओ कॉल आणि व्हॉट्सअॅप संदेशांचा वापर केला जातो.
मोबाईल आणि व्हॉट्सअॅप नंबरवरून कर्नाटक पोलिसातील पोलीस निरीक्षक असल्याचे भासवून, तक्रारदार खंडणी, बेकायदेशीर जाहिरातबाजी आणि मानवी तस्करीमध्ये गुंतलेला असल्याचा खोटा दावा करण्यात आला. आरोपीने तक्रारदाराला एकूण ८० लाख रुपयांची रक्कम हस्तांतरित करून कथित प्रकरण मिटवण्यासाठी प्रलोभन आणि दबाव टाकला, असे पोलिसांनी सांगितले.
