मडगाव : पुढारी वृत्तसेवा
गोव्यात भाडेतत्त्वावरील (रेंट-अ-कार) वाहनांमुळे घडणाऱ्या अपघातांच्या घटना आणि वाहतूक नियमांचे उल्लंघन सातत्याने वाढत असल्याचे चित्र समोर येत असताना रविवारी मध्यरात्री कोलवा येथे आणखी एक धक्कादायक प्रकार घडला.
महाराष्ट्र राज्यात नोंदणीकृत असलेल्या ८१० क्रमांकाच्या भाड्याच्या थार वाहनाने भरधाव वेगात आणि बेदरकारपणे वाहन चालवून तिघा दुचाकीस्वारांच्या जीवाला धोका निर्माण केल्याची घटना घडली. सुदैवाने मोठा अपघात टळला आणि तिन्ही दुचाकीस्वार थोडक्यात बचावले.
शुक्रवारी उत्तर गोव्यातील शिवोली येथील ३२ वर्षीय संकेत दाभोलकर यांचा एका भाड्याच्या थारने दिलेल्या धडकेत मृत्यू झाल्याची घटना अद्याप ताजी असतानाच कोलव्यातील हा प्रकार समोर आल्याने संताप व्यक्त होत आहे.
रविवारी मध्यरात्री संबंधित थार वाहनातून मोठ्या आवाजात संगीत वाजविले जात होते. वाहनातील तिन्ही युवक मद्यधुंद अवस्थेत असल्याचा संशय व्यक्त करण्यात आला आहे.
POLICE कोलवाच्या दिशेने जाणाऱ्या तीन दुचाकीस्वारांना ओव्हरटेक करण्याच्या प्रयत्नात थार चालकाने अत्यंत बेफिकीरपणे वाहन चालवले. एका क्षणी या वाहनाने दुचाकींना धडक देण्याची परिस्थिती निर्माण झाली होती.
