पणजी : पुढारी वृत्तसेवा
सायबर आर्थिक फसवणुकीसाठी इंटेलिजन्स फ्यूजन सेंटर आणि ई-झिरो एफआयआर यंत्रणेचे मुख्यमंत्री डॉ. प्रमोद सावंत यांच्या हस्ते नुकतेच उद्घाटन झाले. यावेळी त्यांच्यासोबत मुख्य सचिव व्ही. कंडावेलू, पोलिस महासंचालक अलोक कुमार व इतर वरिष्ठ पोलिस अधिकारी उपस्थितीत होते.
गुप्तचर संचलित पोलिस काम आणि राष्ट्रीय राज्यस्तरीय गुप्तचर माहिती मिळवून जलद तपास करण्यासाठी गुन्हे शाखा रायबंदर येथे प्रीझम (प्रो-अॅक्टिव्ह रिस्क आयडेंटिफिकेशन अँड सव्र्व्हेलन्स मेकॅनिझम) नावाचे इंटेलिजन्स फ्यूजन सेंटर स्थापन करण्यात आले आहे.
हे केंद्र गुन्हेगारी नेटवर्कची लवकर ओळख, आंतरराज्यीय गुन्हेगारांचा मागोवा घेणे, बेपत्ता व्यक्तींचा शोध घेणे आणि प्रारंभिक तपासाची गुणवत्ता व गती सुधारण्यास मदत करणाऱ्या प्रगत साधनांपर्यंत पोहोचण्यास सक्षम करते.
इंटेलिजन्स फ्यूजन सेंटरची प्राथमिक उद्दिष्टे म्हणजे सुरुवातीच्या तपासाचा जलद मागोवा घेणे, तांत्रिक व विश्लेषणात्मक साधनांचा वाढता वापर आणि डेटा चालित प्रक्रियांद्वारे गुन्हेगारांचा सतत मागोवा घेणे, असे आहे.
सायबर फसवणुकीसाठी आर्थिक ई-झिरो एफआयआर यंत्रणा पीडितांना तत्काळ मदत देण्यासाठी आणि त्वरित तपास करण्यासाठी लागू करण्यात आली आहे. ई-झिरो एफआयआरची उद्दिष्टे नागरिकांना सुविधा देणे, वेळेवर पोलिस तपास करणे आणि फसवणुकीची रक्कम वसूल करण्याची आणि परत करण्याची शक्यता सुधारणे समाविष्ट आहेत.
ई-झिरो-एफआयआर प्रक्रियेंतर्गत, पीडित १९३० सायबर क्राइम हेल्पलाईनद्वारे तक्रार नोंदवू शकतात. एक लाख रुपयांपेक्षा जास्त फसवणुकीच्या तक्रारी सायबर पोलिस ठाण्याला आपोआप ई-एफआयआरमध्ये रुपांतरित केल्या जातील. सायबर पोलिस विभाग रु. ५ लाखांपेक्षा जास्त रकमेच्या सायबर प्रकरणांचा तपास करेल, तर कमी रकमेच्या प्रकरणांचा तपास स्थानिक पोलिस स्थानकाच्या पातळीवर आवश्यक तांत्रिक साहाय्याने केला जाईल.
इंटेलिजन्स फ्यूजन सेंटर आणि ई-झिरो एफआयआर यंत्रणा तंत्रज्ञान सक्षम, बुद्धिमत्ता नेतृत्वाखालील आणि पीडित केंद्रित पोलिसिंगच्या दिशेने एक महत्त्वपूर्ण पाऊल आहे, जे प्रभावी गुन्हेगारी नियंत्रण, जलद तपास आणि सुधारित सार्वजनिक सेवा वितरणासाठी गोवा पोलिसांच्या वचनबद्धतेवर प्रकाश टाकते.
