फोंडा : ओकांब-धारबांदोडा येथील दूध-सागर नदीच्या पात्रात रविवारी सायंकाळी बुडालेल्या आयआयटी गोवा (फर्मागुडी) मधील इम्तियाज हुसेन (वय २१, लडाख) या विद्यार्थ्याचा मृतदेह सोमवारी दुपारी शोध पथकाला सापडला आहे. सुमारे २४ तासांच्या अथक शोधमोहिमेनंतर बचाव पथकाने नदीपात्रातून मृतदेह बाहेर काढला.
रविवारी दुपारी आयआयटीच्या आठ विद्यार्थ्यांचा गट ओकांब येथे गेला होता. नदीपात्रात आंघोळीसाठी उतरले असताना, पाण्याचा आणि खोलीचा अंदाज न आल्याने इम्तियाज अचानक प्रवाहात ओढला गेला. सोबतीला असलेल्या मित्रांनी त्याला वाचवण्याचा प्रयत्न केला; मात्र त्यांना यश आले नाही. यानंतर फोंडा पोलिस आणि अग्निशमन दलाला माहिती देण्यात आली. रविवारी रात्री अंधार पडेपर्यंत शोधमोहीम राबवण्यात आली होती; परंतु मृतदेह सापडला नव्हता.
सोमवारी सकाळी धारबांदोडाचे उपजिल्हाधिकारी अमितेश शिरवोईकर आणि मामलेदार मनोज कोरगावकर यांनी घटनास्थळी उपस्थित राहून शोधकार्याचा आढावा घेतला. दुपारी नदीच्या पात्रातून इम्तियाजचा मृतदेह बाहेर काढण्यात आला.
