मडगाव : मडगाव-कारवार महामार्ग एनएच-६६ वर वार्श-पाडी दरम्यान गॅसवाहू टँकरचा अपघात झाला. त्यामुळे या रस्त्यावरील वाहतूक विस्कळीत झाली होती. या अपघातानंतर सुरक्षेच्या कारणास्तव मडगाव ते काणकोण हमरस्त्यावरील दोन्ही बाजूंची वाहतूक काणकोण आगोंद-बेतुल मार्गे वळविण्यात आली होती.
अपघाताची माहिती मिळताच राज्य सरकारची आपत्कालीन यंत्रणा सतर्क झाली आहे. आपत्ती व्यवस्थापन यंत्रणा सज्ज ठेवण्यात आली आहे. मामलेदार, उपजिल्हाधिकारी तसेच संबंधित अधिकारी, यंत्रणा घटनास्थळी पोहोचले आहेत.
या ठिकाणी पोलिसही तैनात करण्यात आले होते. कुंडईहून एलपीजी कंपनीची यंत्रणाही अपघातस्थळी दाखल झाली आहे. अपघातानंतर मडगाव-काणकोण महामार्गावरील अवजड वाहने तात्पुरती थांबवण्यात आली आहेत.
