म्हापसा : पुढारी वृत्तसेवा
गोव्याचे मुख्यमंत्री डॉ. प्रमोद सावंत यांनी आषाढी एकादशीनिमित्त अन्साभाट, विठ्ठलवाडी, म्हापसा येथील विठ्ठल रखुमाई मंदिरात जाऊन श्री विठ्ठलाची अभिषेक व महापूजा केली.
यावेळी त्यांनी आषाढी एकादशी निमित्त संपूर्ण गोवेकरांना आणि भारतीयांना शुभेच्छा दिल्या. भारत सध्या संस्कृतीच्या दिशेने वाटचाल करीत असून, सुसंस्कृत भारत व सुसंस्कृत गोवा घडत आहे. गोव्यातील बऱ्याचशा भाविकांनी पंढरपुरात जाऊन चंद्रभागेत स्नान करून श्री विठ्ठलाचे मुखदर्शन घेतले आहे. त्यांची वारी सफल झाली. त्यामुळे त्यांचे अभिनंदन असे मुख्यमंत्री डॉ. प्रमोद सावंत यांनी यावेळी बोलताना सांगितले.
यावेळी देवस्थान समितीचे अध्यक्ष तुषार टोपले यांच्या हस्ते मुख्यमंत्री डॉ. प्रमोद सावंत यांचा शाल, श्रीफळ व देवस्थानची प्रतिमा देऊन सत्कार करण्यात आला. यावेळी मुख्यमंत्री डॉ. प्रमोद सावंत आषाढी एकादशी निमित्त विविध वेशभूषा केलेल्या बालगोपाळात रमून गेले होते.
