पणजी : पुढारी वृत्तसेवा
आम आदमी पक्षाचे राष्ट्रीय संयोजक अरविंद केजरीवाल यांनी कुडचडे लैंगिक शोषण प्रकरणावरून भाजप सरकारवर निशाणा साधत भाजप आपल्या काळात कशा प्रकारचे राक्षस पाळत आहे, अशी टीका केली. यामुळे महिलांच्या सुरक्षिततेचा गंभीर प्रश्न निर्माण झाल्याचे ते म्हणाले.
केजरीवाल यांनी सामाजिक माध्यमांवर पोस्ट करत दावा केला की, गोव्यात भाजपशी संबंधित एका नगरसेवकाच्या मुलाकडून गेल्या तीन वर्षांत सुमारे ३० अल्पवयीन मुलींचे लैंगिक शोषण करण्यात आले असून त्यांचे चित्रीकरण करून ब्लॅकमेल केल्याचा आरोप आहे.
त्यांनी या घटनेला अत्यंत घृणास्पद संबोधत राज्यातील कायदा-सुव्यवस्थेवर प्रश्नचिन्ह उपस्थित केले. ते म्हणाले की, अशा प्रकारच्या गुन्हेगारांना संरक्षण मिळणे समाजासाठी अत्यंत धोकादायक असून यामुळे नागरिकांमध्ये भीतीचे वातावरण निर्माण होते.
त्यांनी दोषींवर कठोरात कठोर कारवाई करण्याची आणि पीडित मुलींना न्याय मिळवून देण्याची मागणी केली. तसेच, भविष्यात अशा घटना टाळण्यासाठी कठोर कायदेशीर उपाययोजना आणि निष्पक्ष चौकशी आवश्यक असल्याचेही त्यांनी नमूद केले. दरम्यान, या प्रकरणावरून राजकीय वातावरण तापले असून विरोधकांनी सरकारकडून तत्काळ स्पष्टीकरण आणि कारवाईची मागणी केली आहे.
