हणजूण पोलिसांनी ४.३७ कोटी रुपयांच्या आर्थिक फसवणुकीच्या प्रकरणात महत्त्वपूर्ण कारवाई करत गुन्ह्यातून मिळवलेल्या सुमारे १.२२ कोटी रुपयांच्या जंगम व स्थावर मालमत्तेवर जप्ती आणली आहे. म्हापसा प्रथम श्रेणी न्यायालयाच्या आदेशानुसार भारतीय नागरिक सुरक्षा संहिता (बीएनएसएस) २०२३ च्या कलम १०७ अंतर्गत ही कारवाई करण्यात आली.
हे प्रकरण हणजूण पोलीस ठाण्यातील गुन्हा क्रमांक ७८/२०२५ शी संबंधित असून, भारतीय न्याय संहिता (बीएनएस) २०२३ च्या कलम ३१४, ३१६(४), ३१८(४) आणि ३(५) अंतर्गत गुन्हा दाखल करण्यात आला आहे. आसगाव येथील 'सुखा - द इंडियन प्लॅटर' उर्फ 'सुकून हॉस्पिटॅलिटी'चे मालक शिवकरण सिंग यांच्या तक्रारीवरून हा गुन्हा नोंदवण्यात आला होता.
तपासादरम्यान आरोपी गुलशन कुमार सिंग याने रेस्टॉरंट व्यवस्थापक म्हणून काम करताना बिलिंग नोंदींमध्ये फेरफार करून कंपनीच्या निधीचा अपहार केल्याचे निष्पन्न झाले. त्याने ही रक्कम स्वतःच्या तसेच कुटुंबीयांच्या बँक खात्यांमध्ये वळविल्याचा आरोप असून, या प्रकारामुळे तक्रारदाराचे सुमारे ४.३७ कोटी रुपयांचे नुकसान झाल्याचे पोलीस तपासात समोर आले.
उपनिरीक्षक स्वप्नील नाईक यांनी केलेल्या आर्थिक तपासात अपहार केलेल्या निधीचा मागोवा घेण्यात आला. या पैशातून स्थावर मालमत्ता खरेदी, राहते घर बांधणे, सोन्याचे दागिने खरेदी करणे तसेच कुटुंबीयांना रक्कम हस्तांतरित करण्यात आल्याचे उघड झाले.
तपासादरम्यान मिळालेल्या पुराव्यांच्या आधारे ३१ जानेवारी २०२६ रोजी म्हापसा प्रथम श्रेणी न्यायालयात बीएनएसएसच्या कलम १०७ अंतर्गत अर्ज दाखल करण्यात आला. न्यायालयाने १६ फेब्रुवारी २०२६ रोजी हा अर्ज मंजूर करून गुन्ह्यातून मिळवलेली जंगम व स्थावर मालमत्ता जप्त करण्याचे आदेश दिले.
न्यायालयाच्या आदेशानुसार हणजूण पोलिसांच्या तपास पथकाने दिल्ली येथे जाऊन जप्तीची कारवाई यशस्वीपणे पूर्ण केली. त्यामुळे संबंधित मालमत्तेची विल्हेवाट लावण्यापासून प्रतिबंध करण्यात पोलिसांना यश आले.
या कारवाईत २०२४ मध्ये बांधण्यात आलेले सुमारे १.२० कोटी रुपये किमतीचे घर, तसेच २.५० लाख रुपये किमतीची दुचाकी आणि सोन्याचे दागिने जप्त करण्यात आले आहेत. या प्रकरणाचा पुढील तपास हणजूण पोलीस स्थानकाचे निरीक्षक कृष्णा सिनारी यांच्या मार्गदर्शनाखाली उपनिरीक्षक स्वप्नील नाईक करीत आहे
