पणजी : पुढारी वृत्तसेवा
गोवा प्रदेश काँग्रेस समितीचे अध्यक्ष अमित पाटकर यांनी भाजप सरकारच्या अर्थसंकल्पावर जोरदार टीका केली. १,६६६ कोटी रुपये महसूल अधिशेषाचा दावा दिशाभूल करणारा आणि राज्याच्या वास्तविक आर्थिक स्थितीशी विसंगत आहे.
पाटकर यांनी म्हटले आहे की, मार्च २०२६ पर्यंत गोव्याचे एकूण दायित्वे ३५,६०८ कोटींपर्यंत वाढण्याची अपेक्षा आहे. ते राज्यावरील वाढत्या कर्जाच्या ओझ्याचे स्पष्ट प्रतिबिंब आहे. याव्यतिरिक्त, २०२६-२७ पासून पुढील पाच वर्षांत गोव्याला ११,३७० कोटींपेक्षा जास्त कर्ज परतफेडीच्या जवाबदाऱ्यांना तोंड द्यावे लागेल.
जेव्हा इतकी मोठी देणी अस्तित्वात असतात, तेव्हा अर्थसंकल्प आर्थिकदृष्ट्या सोयीस्कर म्हणून सादर केल्याने सरकारच्या वित्तीय व्यवस्थापनावर गंभीर प्रश्न निर्माण होतात. राज्याच्या महसुलापैकी जवळजवळ ७०. टक्के रक्कम आधीच पगार, पेन्शन आणि कल्याणकारी खर्चासाठी आहे, त्यामुळे अर्थपूर्ण विकास किवा भांडवली गुंतवणुकीसाठी फारच कमी जागा उरते.
पाटकर म्हणाले की, या वर्षीच्या अर्थसंकल्पात पर्यटनासाठी फक्त ३८५ कोटी रुपये वाटप करण्यात आले आहेत, जे गेल्या वर्षीच्या ४४०.९८ कोटी रुपयांच्या वाटपापेक्षा कमी आहे. यापैकी २६९ कोटी रुपये महसूल खर्चासाठी आणि फक्त ११६ कोटी रुपये भांडवली खर्चासाठी आहेत.
पर्यटन पायाभूत सुविधा मजबूत करणे, सुविधा सुधारणे किंवा पर्यटन अर्थव्यवस्थेला आधार देणाऱ्या गोव्याच्या सांस्कृतिक आणि वारसा मालमत्तेचे संरक्षण करण्यात सरकारचा गांभीर्य नसल्याचे यावरून स्पष्ट होते.
रोजगाराबाबत पाटकर म्हणाले की, नीती आयोगाच्या अंदाजानुसार गोव्यात १.१ लाखांहून अधिक तरुण बेरोजगार असताना सरकारने २,५०० नोकऱ्यांची घोषणा करणे अत्यंत अपुरे आहे. जानेवारी २०२६ पर्यंत गोव्याचा बेरोजगारी दर ९.७ टक्के होता, जो राष्ट्रीय सरासरीच्या सुमारे ५ टक्केच्या दुप्पट होता गोव्यातील तरुणांच्या सर्वात तातडीच्या चिंतेचे निराकरण करण्यात सरकार अपयशी ठरले आहे.
गोवा किनारपट्टीवरील धूप, समुद्राची वाढती पातळी आणि अतिरेकी हवामान घटनांसारख्या हवामान धोक्यांना अत्यंत असुरक्षित असूनही, हवामान बदल उपक्रमांसाठी १० कोटी रुपयांच्या तुटपुंज्या वाटपावरही पाटकर यांनी टीका केली.
अपेक्षाभंग झाला
'गोव्यातील लोकांसाठी रोजगार निर्माण करणारा, पर्यटनाला बळकटी देणारा, हवामान धोक्यांसाठी राज्याला तयार करणारा आणि जबाबदार आर्थिक व्यवस्थापन सुनिश्चित करणारा अर्थसंकल्प अपेक्षित होता, असेही पाटकर म्हणाले.
