जामखेड, पुढारी वृतसेवा: धनगर समाजातील कुटुंबांनी घरकुल योजनेचा लाभ घ्यावा. त्यासाठी ग्रामपंचायतीशी संपर्क साधावा, असे आवाहन गटविकास अधिकारी प्रकाश पोळ यांनी केले. शासन निर्णय 6 सप्टेंबर 2019 नुसार यशवंतराव चव्हाण मुक्त वसाहत योजनेच्या अटी शर्ती लागू करून धनगर समाजातील पात्र व वंचित कुटुंबासाठी घरकुल योजना सुरू करण्याचा निर्णय राज्य सरकारने घेतला आहे. पंचायत समिती या योजनेची अंमलबजावणी करण्यात येत आहे.
धनगर समाजातील जास्तीत जास्त पात्र लाभार्थ्यांनी या योजनेसाठी अर्ज करावे, असे आवाहन गटविकास अधिकारी प्रकाश पोळ यांनी केले आहे. लाभार्थी कुटुंबाचे वार्षिक उत्पन्न रुपये 1 लाख 20 हजारांपेक्षा कमी असावे, लाभार्थी बेघर अथवा झोपडी, कच्चेघर, पालांमध्ये राहणारा असला पाहिजे. लाभार्थ्यांचा समावेश पंतप्रधान आवास योजनेतील 'ड' यादीमध्ये नसावा. लाभार्थ्यांकडे 269 चौरस फूट घराचे बांधकाम करता येईल, इतकी स्वतःची जागा असावी. इच्छुक व पात्र लाभार्थ्यांनी विहित नमुन्यात अर्ज व इतर कागदपत्रे ग्रामपंचायतीमध्ये जमा करावी.
घरकुल मंजूर झाल्यानंतर लाभार्थ्यांना घरकूल बांधकामासाठी 1.20 लक्ष, रोजगार अंतर्गत बांधकाम मंजुरी 23040 रुपये, शौचालयासाठी 12 हजार असे एकूण 1 लाख 55 हजार 40 रुपये अनुदान देण्यात येईल. लाभार्थ्यांना किमान 269 चौ. फु. बांधकाम करावे लागेल. घरकुल व रोजगार हमीचा निधी बांधकाम टप्प्यानुसार 4 हफ्त्यांत देण्यात येईल.
