To avoid financial loss, make sure to carry out 'these' 7 tasks at home; your bank balance will grow
पुढारी ऑनलाईन : Vastu Tips for Money: पैसा ही आपल्या जीवनातील एक महत्त्वाची गरज आहे. प्रत्येकाला आपल्या घरात सुख-शांती नांदावी आणि पैशांची कमतरता भासू नये, असे वाटते. वास्तुशास्त्रात धन आणि समृद्धीसाठी काही सोपे नियम सांगितले आहेत. चला तर मग जाणून घेऊया अशा काही उपायांबद्दल, ज्यांचा अवलंब करून तुम्ही घरात सुख-समृद्धी टिकवून ठेवू शकता.
Vastu Tips for Money: वास्तुशास्त्रात घराच्या दिशा आणि वस्तू योग्य ठिकाणी ठेवण्याला विशेष महत्त्व दिले जाते. वास्तुशास्त्रातील काही नियमांचे पालन केल्यास पैशांशी संबंधित समस्या कमी होऊ शकतात, अशी मान्यता आहे. अनेकदा कर्ज आणि वाढत्या खर्चामुळे तणावही वाढतो. अशा परिस्थितीत आर्थिक स्थिती सुधारण्यासाठी आणि आनंदी जीवन जगण्यासाठी वास्तुशास्त्रात काही उपाय सांगितले आहेत.
या नियमांचे पालन केल्याने घरात सकारात्मक वातावरण टिकून राहते. तसेच प्रगतीच्या नवीन संधी उपलब्ध होतात, असे मानले जाते. त्यामुळे तुम्हालाही आर्थिक समृद्धी हवी असेल, तर घरात वास्तुशास्त्रातील या ७ नियमांची काळजी घेऊ शकता.
उत्तर आणि ईशान्य दिशेला ठेवा कुबेर यंत्र
हिंदू धर्मात भगवान कुबेर यांना धनाची देवता मानले जाते. वास्तुशास्त्रानुसार घराची उत्तर दिशा ही धनाशी संबंधित मानली जाते. तर ईशान्य दिशा स्वच्छ आणि मोकळी ठेवणे शुभ मानले जाते. या ठिकाणी स्वच्छतागृह, चपला-बूट ठेवण्याचे रॅक किंवा जड फर्निचर ठेवणे टाळावे.
वास्तुशास्त्रानुसार घराच्या उत्तरेकडील भिंतीवर आरसा किंवा कुबेर यंत्र लावल्याने पैसे कमावण्याच्या नवीन संधी उपलब्ध होऊ शकतात.
नैऋत्य दिशेला ठेवा तिजोरी
वास्तुशास्त्रात नैऋत्य दिशा स्थिरतेशी संबंधित मानली जाते. या दिशेला पैसे, दागिने आणि महत्त्वाची कागदपत्रे ठेवल्याने आर्थिक स्थिती मजबूत राहू शकते, अशी मान्यता आहे.
या दिशेला तुम्ही कपाट किंवा तिजोरी ठेवू शकता. मात्र, तिजोरीचा दरवाजा उत्तर किंवा ईशान्य दिशेला उघडेल, याची काळजी घ्या. वास्तुशास्त्रानुसार दक्षिण किंवा पश्चिम दिशेला उघडणारी तिजोरी ठेवणे टाळावे.
घराचा मुख्य दरवाजा नेहमी व्यवस्थित ठेवा
घराचा मुख्य दरवाजा हा केवळ येण्या-जाण्याचा मार्ग नसून वास्तुशास्त्रातही त्याला विशेष महत्त्व आहे. त्यामुळे मुख्य दरवाजा नेहमी स्वच्छ ठेवावा.
दरवाजाची कुठे मोडतोड झाली असेल किंवा कुलूप व्यवस्थित काम करत नसेल, तर ते लवकरात लवकर दुरुस्त करून घ्यावे. मुख्य दरवाजाजवळ तुम्ही छोटी रोपेही लावू शकता. वास्तुशास्त्रानुसार स्वच्छ आणि सुस्थितीत असलेला मुख्य दरवाजा घरातील सुख-समृद्धीसाठी शुभ मानला जातो.
ईशान्य दिशेला ठेवा एक्वेरियम
वास्तुशास्त्रात ईशान्य दिशेला पाण्याशी संबंधित वस्तू ठेवणे शुभ मानले जाते. या दिशेला तुम्ही पाण्याचे छोटे कारंजे किंवा मत्स्यालय (एक्वेरियम) ठेवू शकता. यामुळे घरात सकारात्मक ऊर्जा टिकून राहते, अशी मान्यता आहे. मात्र, यातील पाणी स्वच्छ असावे, याची काळजी घ्या. मत्स्यालयाची नियमित स्वच्छता करा. तसेच कारंज्यातील पाणीही वेळोवेळी बदलत राहा.
घरात कुठेही पाणी गळत असेल, तर त्वरित दुरुस्ती करा
घरातील स्वयंपाकघर, स्नानगृह किंवा बागेत कुठेही पाणी गळत असेल, तर त्याकडे दुर्लक्ष करू नका. खराब नळ किंवा पाइपमधून पाणी वाहत राहिल्यास पाण्याचा अपव्यय होतो. तसेच पाण्याचे बिलही वाढू शकते. वास्तुशास्त्रात पाण्याची गळती आर्थिक नुकसानीशी संबंधित मानली जाते. त्यामुळे नळ, पाइप किंवा छतातून पाणी गळत असल्यास ते लवकरात लवकर दुरुस्त करून घ्यावे.
'या' दिशेला ठेवू नका पाण्याची टाकी
वास्तुशास्त्रानुसार घराच्या ईशान्य आणि आग्नेय दिशेला पाण्याची टाकी ठेवणे टाळावे. या दिशांना पाण्याची टाकी ठेवल्याने घराचे संतुलन बिघडू शकते, अशी मान्यता आहे. वास्तुशास्त्रात पाण्याची गळती पैशांच्या नुकसानीशी संबंधित मानली जाते. त्यामुळे घराच्या छतावर पाण्याची टाकी बसवताना योग्य जागेची निवड करण्याकडे लक्ष द्यावे.
दक्षिण-पश्चिम दिशेला बांधू नका टॉयलेट
वास्तुशास्त्रानुसार घराच्या नैऋत्य दिशेला स्वच्छतागृह बांधणे शुभ मानले जात नाही. या दिशेला स्वच्छतागृह असल्यास घरात आर्थिक समस्या, तणाव आणि झोपेशी संबंधित त्रास निर्माण होऊ शकतात, अशी मान्यता आहे. वास्तुशास्त्रानुसार स्वच्छतागृहासाठी वायव्य दिशा अधिक योग्य मानली जाते.
टीप: वरील उपाय वास्तुशास्त्रातील पारंपरिक मान्यता आणि श्रद्धांवर आधारित आहेत. या उपायांमुळे आर्थिक स्थिती सुधारते किंवा बँक बॅलन्स वाढतो, याला वैज्ञानिक पुष्टी नाही.
