सावधान ! हॅकर्सच्या निशाण्यावर 'ही' मोठी मोबाईल कंपनी, तुमच्या डिव्हाइसची सुरक्षा देखील असू शकते धोक्यात
नवी दिल्ली : जर तुम्ही शाओमी (Xiaomi) कंपनीचा स्मार्टफोन, टीव्ही किंवा लॅपटॉप वापरत असाल, तर ही बातमी तुमच्यासाठी अत्यंत महत्त्वाची आहे. भारत सरकारची सायबर सुरक्षा एजन्सी, CERT-In ने (इंडियन कॉम्प्युटर इमर्जन्सी रिस्पॉन्स टीम) शाओमी यूजर्ससाठी एक 'गंभीर' इशारा जारी केला आहे.
एजन्सीच्या मते, शाओमी (Xiaomi) कंपनीच्या उपकरणांमध्ये एक अशी धोकादायक त्रुटी आढळली आहे, जिचा फायदा घेऊन हॅकर्स तुमच्या डिव्हाइसचा संपूर्ण ताबा मिळवू शकतात. यामुळे तुमच्या मोबाईल डिव्हाइस आणि कंपनीच्या इतर वस्तुंची सुरक्षा धोक्यात येते.
कोणत्या ॲपमध्ये आहे धोका?
CERT-In च्या सूचनेनुसार, ही सुरक्षेतील त्रुटी शाओमीच्या 'Mi Connect' या ॲपमध्ये आढळून आली आहे. या त्रुटीमुळे केवळ शाओमीचे स्मार्टफोनच नव्हे, तर टीव्ही आणि लॅपटॉपसारखी उपकरणेही प्रभावित झाली आहेत. अहवालात म्हटले आहे की, ही त्रुटी इतकी गंभीर आहे की सायबर गुन्हेगार तिचा फायदा घेऊन डिव्हाइसची सुरक्षा सहज भेदू शकतात आणि ते पूर्णपणे आपल्या नियंत्रणात घेऊ शकतात. या प्रकरणामुळे कंपनीच्या लाखो यूजर्सच्या सुरक्षिततेवर गंभीर प्रश्न निर्माण झाले आहेत.
धोक्यापासून कसे वाचाल? तात्काळ हे करा
CERT-In ने या धोक्यापासून वाचण्यासाठी तातडीने उपाययोजना करण्याचा सल्ला दिला आहे. यूजर्सनी सर्वप्रथम हे तपासावे की त्यांच्या शाओमी फोन, टॅब्लेट किंवा टीव्हीमधील Mi Connect ॲपचे व्हर्जन 3.1.895.10 किंवा त्यापूर्वीचे तर नाही ना?
काय करावे : जर तुमच्या डिव्हाइसमध्ये जुने व्हर्जन असेल, तर ते त्वरित लेटेस्ट व्हर्जनमध्ये अपडेट करा.
कसे कराल : ॲप अपडेट करण्यासाठी तुम्ही डिव्हाइसच्या सेटिंग्समधील ॲप मॅनेजमेंट सेक्शनमध्ये जाऊ शकता किंवा प्ले स्टोअरवरून ॲप अपडेट करू शकता.
हलगर्जीपणा महागात पडू शकतो
जरी भारतात या त्रुटीमुळे कोणताही यूजर प्रभावित झाल्याचे अधिकृत वृत्त समोर आलेले नाही, तरीही एजन्सीने सर्व शाओमी यूजर्सना कोणताही विलंब न करता ॲप अपडेट करण्याचा सल्ला दिला आहे. जर वेळेवर कारवाई केली नाही, तर सायबर ठग या सुरक्षेतील त्रुटीचा फायदा घेऊन तुमच्या डिव्हाइसला लक्ष्य करू शकतात. CERT-In वेळोवेळी असे धोक्याचे इशारे जारी करते, जेणेकरून यूजर्सना सायबर हल्ल्यांपासून सुरक्षित ठेवता येईल.
