कॉम्प्युटर सायन्सची पदवी नाही, तरीही जगातील तंत्रज्ञानाचा बादशाह ! जाणून घ्या, 'एलन मस्क' यांच्या शिक्षणाविषयी

टेक न्यूज : ज्या व्यक्तीने वयाच्या 10 व्या वर्षी प्रोग्रामिंग शिकली, 12 व्या वर्षी व्हिडिओ गेम विकून कमाई केली आणि आज टेस्ला (Tesla), स्पेसएक्स (SpaceX) आणि एक्स (X) सारख्या कंपन्यांच्या माध्यमातून जगाला बदलून टाकले आहे, त्या एलन मस्क यांच्या शिक्षणाबद्दल तुम्हाला माहिती आहे का? तंत्रज्ञानाच्या या जादूगाराकडे कॉम्प्युटर सायन्सची पदवी नाही. चला, त्यांच्या शैक्षणिक प्रवासावर एक नजर टाकूया.

दक्षिण आफ्रिकेत जन्मलेल्या एलन मस्क यांना लहानपणापासूनच पुस्तके आणि कॉम्प्युटरमध्ये विशेष रस होता. त्यांनी वयाच्या अवघ्या 10 व्या वर्षी स्वतःहून कॉम्प्युटर प्रोग्रामिंग शिकली आणि १२ व्या वर्षी 'ब्लास्टर' नावाचा एक व्हिडिओ गेम तयार करून तो 500 डॉलर्समध्ये विकला. आई-वडिलांच्या घटस्फोटानंतर त्यांचे बालपण काहीसे एकाकी गेले, पण तंत्रज्ञानाच्या वेडाने त्यांना एका वेगळ्याच मार्गावर नेले.

अनेकांना आश्चर्य वाटेल की, एलन मस्क यांच्याकडे कॉम्प्युटर सायन्सची पदवी नाही. कॅनडातील क्वीन्स युनिव्हर्सिटीमध्ये दोन वर्षे शिक्षण घेतल्यानंतर त्यांनी अमेरिकेतील प्रतिष्ठित पेनसिल्व्हेनिया युनिव्हर्सिटीमध्ये प्रवेश घेतला. येथून त्यांनी 1997 मध्ये दोन वेगवेगळ्या विषयात पदवी मिळवली. भौतिकशास्त्राच्या ज्ञानाने त्यांना रॉकेट आणि अभियांत्रिकी समजण्यास मदत केली, तर अर्थशास्त्राच्या अभ्यासाने त्यांना व्यवसायाचे गणित मांडण्याचा पाया दिला.

• बॅचलर ऑफ सायन्स (B.Sc) - भौतिकशास्त्र (Physics)

• बॅचलर ऑफ आर्ट्स (B.A.) - अर्थशास्त्र (Economics)

पदवी घेतल्यानंतर मस्क यांनी ऊर्जा भौतिकशास्त्र (Energy Physics) विषयात पीएचडी करण्यासाठी स्टॅनफोर्ड युनिव्हर्सिटीमध्ये प्रवेश घेतला. पण त्या काळात इंटरनेट क्रांती वेगाने वाढत होती. ही संधी ओळखून त्यांनी केवळ दोन दिवसांतच पीएचडी सोडण्याचा धाडसी निर्णय घेतला आणि आपला मोर्चा व्यवसायाकडे वळवला. हा त्यांच्या आयुष्यातील एक निर्णायक क्षण ठरला.

पीएचडी सोडून त्यांनी आपला भाऊ किम्बल याच्यासोबत 'Zip2' नावाची कंपनी सुरू केली, जी पुढे 307 दशलक्ष डॉलर्समध्ये ती कंपनी विकली. त्यानंतर त्यांनी डिजिटल पेमेंट कंपनी X.com सुरू केली, जी आज 'पेपल' (PayPal) म्हणून ओळखली जाते. पेपलच्या विक्रीनंतर मिळालेल्या पैशातून त्यांनी अंतराळ प्रवासाला स्वस्त करण्याच्या उद्देशाने 2002 मध्ये 'स्पेसएक्स'ची स्थापना केली आणि 2004 मध्ये ते इलेक्ट्रिक कार कंपनी 'टेस्ला'मध्ये सामील झाले.

थोडक्यात, एलन मस्क यांची कहाणी हेच सांगते की, औपचारिक पदव्या महत्त्वाच्या असल्या तरी, जिज्ञासा, स्वतः शिकण्याची आवड आणि योग्य वेळी धोका पत्करण्याची तयारी तुम्हाला यशाच्या शिखरावर पोहोचवू शकते.