Tilgul Ladoo Recipe: मकर संक्रांत म्हटली की घराघरांत तीळ-गुळाचा सुवास दरवळू लागतो. "तीळ गूळ घ्या, गोड गोड बोला" म्हणत एकमेकांना दिले जाणारे तिळाचे लाडू चवीला जितके छान लागतात, तितकेच ते आरोग्यासाठीही फायदेशीर असतात. पण अनेकांना पाक चुकण्याची किंवा लाडू कडक होण्याची भीती वाटते. यंदाच्या संक्रांतीला आमच्या या खास रेसिपीने बनवा रसाळ आणि खुसखुशीत लाडू!
तीळ: अर्धा किलो (सुमारे २ वाट्या)
गूळ: अर्धा किलो (२ वाट्या)
भाजलेले शेंगदाणे: १५० ग्रॅम (पाऊण वाटी, जाडसर कूट किंवा पाकळ्या)
साजूक तूप: २ मोठे चमचे (लाडूंना चकाकी येण्यासाठी)
पाणी: २ चमचे
ड्रायफ्रूट्स: आवडीनुसार
१. तीळ भाजणे: सर्वात आधी जाड तळाच्या कढईत तीळ घ्या. मंद आचेवर ४ ते ५ मिनिटे तीळ तडतडेपर्यंत आणि छान फुलेपर्यंत भाजून घ्या. तीळ जास्त जळणार नाहीत याची काळजी घ्या. भाजलेले तीळ एका ताटात काढून पूर्णपणे गार होऊ द्या.
२. शेंगदाणे तयार करणे: भाजलेल्या शेंगदाण्यांची साले काढून घ्या. ते एका स्वच्छ कापडात घेऊन जाडसर कुटून घ्या. हे शेंगदाणे आता भाजलेल्या तिळात मिसळून ठेवा.
३. गुळाचा पाक: कढईत २ चमचे तूप आणि बारीक चिरलेला गूळ एकत्र करा. त्यात दोन चमचे पाणी टाका (पाण्यामुळे लाडू चिवट होत नाहीत). मंद आचेवर गूळ विरघळू द्या. साधारण ४ मिनिटांनंतर पाकाला फेस येऊ लागेल.
४. पाकाची परीक्षा: एका वाटीत पाणी घेऊन त्यात पाकाचे दोन थेंब टाका. जर पाकाचा मऊ गोळा तयार झाला, तर समजावे की पाक तयार आहे. लक्षात ठेवा, पाक जास्त कडक झाला तर लाडू दगडासारखे टणक होतात.
५. मिश्रण एकजीव करणे: पाक तयार झाल्यावर त्यात तीळ आणि शेंगदाण्याचे मिश्रण घालून व्यवस्थित हलवा. यावेळी गॅसची आंच अगदी कमी ठेवा किंवा बंद करा.
६. लाडू वळणे: मिश्रण गरम असतानाच हाताला थोडे पाणी लावून मध्यम आकाराचे लाडू वळा. सुरुवातीला आकार बिघडला तरी हरकत नाही, एकदा सर्व लाडू वळून झाले की थोडे कोमट असतानाच त्यांना पुन्हा हातावर फिरवून गोलाकार द्या.
मिश्रण चिकट झाले तर: जर पाक कच्चा राहिला असेल तर मिश्रण हाताला चिकटते. अशा वेळी मिश्रण मंद आचेवर पुन्हा अर्धा-एक मिनिट गरम करून घ्या.
मिश्रण कोरडे पडल्यास: पाक जास्त शिजल्यामुळे लाडू वळता येत नसतील, तर थोडा गूळ आणि तूप गरम करून तयार पाकात मिसळा, मिश्रण पुन्हा मऊ होईल.
पाण्याचा वापर: लाडू वळताना हात फक्त ओले करा, जास्त पाणी लावल्यास लाडू लवकर खराब होऊ शकतात.
साठवणूक: लाडू वळल्यानंतर १-२ तास उघड्यावरच वाळू द्या. त्यातील ओलावा पूर्ण गेल्यावरच ते हवाबंद डब्यात भरा.
