Lifestyle health 3 breathing technique to try to calm down stressful situation
पुढारी ऑनलाईन : जेव्हा कामाचा ताण वाढतो किंवा एखादी अशी घटना घडते की ज्यामुळे तुम्हाला स्ट्रेस जाणवू लागतो, श्वास घेण्यास त्रास होतो आणि हृदयाची धडधड वेगाने वाढते, तेव्हा स्ट्रेसमधून बाहेर पडण्यासाठी 4-7-8 हे तंत्र वापरा. यामुळे आराम मिळेल.
कामकाजाच्या आणि धावपळीच्या वातावरणात अनेकदा मेंदूवर इतका ताण येतो की आपल्याला स्ट्रेस होतो. अनेकदा हा स्ट्रेस आणि तणाव इतका वाढतो की श्वास घेणे कठीण होते, घाबरल्यासारखे वाटते आणि अस्वस्थता जाणवू लागते. अचानक आलेल्या स्ट्रेसमुळे काही वेळा लोकांचा रक्तदाब वाढतो आणि हळूहळू हायपरटेन्शनची समस्या निर्माण होऊ शकते.
आयुष्यात जेव्हा असे प्रसंग येतात आणि तुम्हाला खूप स्ट्रेस जाणवतो, तेव्हा श्वसनाची काही तंत्रे नक्की लक्षात ठेवा. ही तंत्रे तुमचे लक्ष आणि एकाग्रता टिकवून ठेवण्यास मदत करतात. स्ट्रेस नियंत्रित करण्यासाठी अनेक प्रकारचे श्वसनाचे व्यायाम आहेत, जे मज्जासंस्थेला शांत करतात.
स्ट्रेसच्या वेळी आपले शरीर ‘फाइट ऑर फ्लाइट’ म्हणजेच लढा किंवा पळा अशा स्थितीत जाते. अशा वेळी श्वास घेण्याचा वेग खूप महत्त्वाचा असतो. श्वास घेण्याची गती बदलते, हृदयाची धडधड वाढते आणि मेंदूला काम करणे कठीण होते. अशा परिस्थितीत मज्जासंस्थेला शांत करण्याचा एक मार्ग म्हणजे आपल्या श्वासांवर नियंत्रण ठेवणे. योग्य पद्धतीने श्वास घेतल्याने मन स्थिर होते आणि शरीर सामान्य स्थितीत येण्यास मदत होते.
स्ट्रेसच्या परिस्थितीत श्वास घेण्याची ही तंत्रे वापरा
डायाफ्रामॅटिक ब्रीदिंग म्हणजेच पोटातून श्वास घेणे.
शरीराला आराम देण्याचा हा सर्वात सोपा मार्ग आहे. पोटाचा वापर करून श्वास घेण्याचा प्रयत्न करा.
एक हात छातीवर आणि दुसरा हात पोटावर ठेवा.
आता श्वास आत घ्या, ज्यामुळे पोट फुगेल आणि छाती शक्य तितकी स्थिर राहील.
त्यानंतर हळूहळू श्वास बाहेर सोडा.
श्वास घेण्याच्या या तंत्रामुळे शरीरातील ऑक्सिजनचा पुरवठा वाढतो आणि शरीराला नैसर्गिकरीत्या आराम मिळण्यास मदत होते.
बॉक्स ब्रीदिंग
जेव्हा तुम्ही एखाद्या मीटिंगला किंवा प्रेझेंटेशनला जाणार असता किंवा एखाद्या प्रसंगी भावनिकदृष्ट्या खूप तणाव जाणवत असतो, तेव्हा बॉक्स ब्रीदिंग उपयुक्त ठरते.
श्वासावर नियंत्रण ठेवण्यासाठी पुढील पद्धत वापरा.
चार मोजेपर्यंत श्वास आत घ्या.
त्यानंतर चार मोजेपर्यंत श्वास रोखून ठेवा.
मग चार मोजेपर्यंत श्वास बाहेर सोडा.
श्वास नियंत्रित करण्याची ही प्रक्रिया वेगाने वाढलेली हृदयाची धडधड शांत करण्यास आणि मनाची एकाग्रता वाढवण्यास मदत करते.
एकाग्रता वाढवण्यासाठी 4-7-8 हे तंत्र शिका
श्वासावर नियंत्रण ठेवण्यासोबतच एकाग्रता वाढवण्यासाठी 4-7-8 हे तंत्र वापरा.
सर्वप्रथम नाकाने चार मोजेपर्यंत श्वास आत घ्या.
त्यानंतर सात मोजेपर्यंत श्वास रोखून ठेवा.
आणि मग हळूहळू तोंडाने आठ मोजेपर्यंत श्वास बाहेर सोडा.
श्वास घेण्याची आणि सोडण्याची ही दीर्घ प्रक्रिया केल्यामुळे पॅरासिम्पथेटिक मज्जासंस्था सक्रिय होते. त्यामुळे शरीराला आराम मिळतो आणि श्वासोच्छ्वासाची गती मंदावते.
टीप : श्वासासंबंधीत कोणतीही समस्या जाणवत असल्यास किंवा स्ट्रेस जाणवत असल्यास तज्ञ डॉक्टरांचा सल्ला घेणे उपयुक्त आहे. वरील माहिती सर्वसाधारणपणे देण्यात आली आहे.
