पंचवटी (नाशिक) : रामवाडीतील आदर्श नगर परिसरात भरदिवसा दोन संशयितांनी पाणी पिण्याचा बहाना करत महिलेच्या गळ्यातील सोनसाखळी लांबविल्याची घटना शुक्रवार (दि.१२) रोजी घडली आहे. या प्रकरणी पंचवटी पोलिस ठाण्यात गुन्हा दाखल करण्यात आला असून हा सर्व प्रकार सीसीटीव्हीत कैद झाला आहे. घटनेचा अधिक तपास पंचवटी पोलिस करीत आहेत.
याबाबत अधिक माहिती अशी की, नंदिनी नारायण नायक (वय ६५, रा. श्रद्धा पार्क, आदर्श नगर, रामवाडी, पंचवटी, नाशिक ) या खाजगी रुग्णालयात रिसेप्शनिस्ट म्हणून काम करतात. शुक्रवार (दि.१२) रोजी नियमित प्रमाणे कामकाज उरकून चार ते पाच वाजेच्या दरम्यान दळणाचा डबा घेऊन राहते घरी पोहचल्या. घरामध्ये दळणाचा डबा व हातातील पिशवी ठेवली. यावेळी दोन अज्ञात संशयितांनी त्यांना पत्ता विचारला आणि पिण्यासाठी पाणी मागितले. नायक यांनी त्या दोघांना पिण्यासाठी पाणी दिले, त्यानंतर त्यातील एका संशयिताने नंदिनी नारायण नायक यांच्या गळ्यातील सोनसाखळी खेचली. नायक यांनी त्यास विरोध केला. मात्र, त्याने अर्धी सोनसाखळी घेऊन पोबारा केला. नंदिनी नायक यांनी ही बाब तातडीने त्यांच्या मुलीला सांगितली आणि त्यांनी पंचवटी पोलिस ठाणे गाठत गुन्हा दाखल केला आहे. या घटनेमुळे परिसरात भीतीचे वातावरण पसरले असून, स्थानिक नागरिकांमध्ये संतापाची लाट आहे. सध्या पोलिसांनी या प्रकरणाचा तपास सुरू केला असून, सीसीटीव्ही फुटेजच्या आधारे आरोपींचा शोध घेतला जात आहे.
या संपूर्ण प्रकार सीसीटीव्ही कॅमेऱ्यात कैद झाला आहे. या फुटेजमध्ये आरोपींचा महिलेला केलेला हल्ला स्पष्टपणे दिसून येतो आहे. नंदिनी नायक यांच्या समवेत अचानक झालेल्या प्रकार असला तरी त्यांनी प्रतिकार देखील केल्याचे यात दिसत आहे.
