जळगाव : घरातील वीज मीटरमध्ये छेडछाड केल्याचा बनाव करत एका नागरिकाकडून 15 हजारांची लाच मागणाऱ्या वायरमनला लाचलुचपत प्रतिबंधक विभागाने मंगळवार (दि.10) रोजी 5 हजारांची लाच स्वीकारताना रंगेहात अटक केली.
तक्रारदार हे 46 वर्षीय असून, त्यांच्या घराचे वीज मीटर हे पूर्वीच्या मालकाच्या नावावर होते. महावितरणकडून वीज मीटर बदलण्याचे काम सुरू असताना कंत्राटी वायरमन भूषण शालिग्राम चौधरी (वय 37, नेमणूक – प्रभात कॉलनी कक्ष, जळगाव) हे तीन दिवसांपूर्वी तक्रारदाराच्या घरी आले. त्यांनी वीज मीटरचे सील तुटलेले असून, छेडछाड केल्याचा आरोप करत वीज चोरीचा गुन्हा दाखल होईल, असे सांगितले.
गुन्हा दाखल न करण्यासाठी आणि वीज मीटर टेस्टिंग रिपोर्ट "ओके" देण्यासाठी चौधरी यांनी तक्रारदाराकडे 15 हजार रुपयांची लाचेची मागणी केली. ही माहिती तक्रारदाराने लाचलुचपत प्रतिबंधक विभागाकडे (Anti-Corruption Bureau) दिली.
मंगळवार (दि.10) रोजी पडताळणी दरम्यान, चौधरी यांनी पंचासमक्ष 5 हजार रुपयांची लाच स्वीकारली, त्यावेळी त्यांना रंगेहाथ अटक करण्यात आली आहे. सध्या रामानंद नगर पोलीस ठाण्यात गुन्हा नोंद करण्याची प्रक्रिया सुरू आहे. पोलिस उपअधीक्षक योगेश ठाकूर यांच्या मार्गदर्शनाखाली, पोलीस निरीक्षक स्मिता नवघरे, सुरेश पाटील, सुनील वानखेडे आणि अमोल सूर्यवंशी यांच्या पथकाने ही कारवाई केली.
