hanuman chalisa path time rules benefits right way chant hanuman chalisa
पुढारी ऑनलाईन : हनुमान चालीसाचे पठण केल्याने मनाला शांती मिळते, अशी धार्मिक मान्यता आहे. मात्र, हनुमान चालीसा सकाळी, संध्याकाळी की रात्री कधी म्हणावी, असा प्रश्न अनेकांना पडतो. जाणून घ्या हनुमान चालीसाच्या पठणाची योग्य वेळ, पद्धत आणि त्यासंबंधीचे महत्त्वाचे नियम.
हनुमानजींना संकटमोचक म्हटले जाते. अशी धार्मिक श्रद्धा आहे की, जे भक्त मनोभावे त्यांची पूजा करतात, त्यांच्यावर बजरंगबलीची कृपा कायम राहते. त्यामुळे अनेकजण दररोज हनुमान चालीसाचे पठण करतात. अनेक भक्तांना तर हनुमान चालीसेतील चौपायादेखील तोंडपाठ असतात. विशेषतः मंगळवार आणि शनिवार या दिवशी घरांमध्ये तसेच मंदिरांमध्ये हनुमान चालीसा म्हणण्याची परंपरा आहे. हनुमान जयंतीच्या दिवशीही बजरंगबलीची पूजा आणि चालीसा पठणाला विशेष महत्त्व आहे.
धार्मिक मान्यतेनुसार, दररोज हनुमान चालीसाचे पठण केल्याने मनाला शांती मिळते आणि कठीण प्रसंगांचा सामना करण्यासाठी धैर्य मिळते. मात्र, हनुमान चालीसा म्हणण्याची योग्य वेळ कोणती? सकाळी की संध्याकाळी पठण करावे? रात्रीदेखील हनुमान चालीसा म्हणू शकतो का? जाणून घेऊया हनुमान चालीसा पठणाची योग्य वेळ आणि त्यासंबंधीचे महत्त्वाचे नियम.
हनुमान चालीसाचे पठण कधी करावे?
हनुमान चालीसाचे पठण करण्यासाठी एखाद्या विशिष्ट दिवसाची वाट पाहण्याची गरज नाही. भक्त दररोज याचे पठण करू शकतात. मात्र, मंगळवार आणि शनिवार या दिवशी हनुमान चालीसा म्हणणे विशेष शुभ मानले जाते.
धार्मिक मान्यतेनुसार, मंगळवार हा दिवस हनुमानजींना समर्पित आहे. तर शनिवारी बजरंगबलीची पूजा केल्याने शनिदेवाशी संबंधित अडचणी दूर होतात, अशी श्रद्धा आहे. याशिवाय हनुमान जयंतीच्या दिवशीही हनुमान चालीसाचे पठण करणे शुभ मानले जाते.
सकाळी स्नान केल्यानंतर करा पठण
हनुमान चालीसा म्हणण्यासाठी सकाळची वेळ उत्तम मानली जाते. धार्मिक मान्यतेनुसार, सकाळी लवकर उठून स्नान करावे, स्वच्छ कपडे परिधान करावेत आणि पूजास्थळी बसून बजरंगबलींचे स्मरण करावे. त्यानंतर शांत मनाने हनुमान चालीसाचे पठण करावे. सकाळी पठण करण्यासोबतच संध्याकाळीही हनुमान चालीसा म्हणणे शुभ मानले जाते.
झोपण्यापूर्वीही करू शकता हनुमान चालीसाचे पठण
दिवसभराच्या धावपळीमुळे सकाळी किंवा संध्याकाळी हनुमान चालीसा म्हणणे शक्य झाले नाही, तर रात्री झोपण्यापूर्वीही तिचे पठण करू शकता. अशी धार्मिक मान्यता आहे की, रात्री झोपण्यापूर्वी बजरंगबलींचे स्मरण आणि हनुमान चालीसाचे पठण केल्याने मनात सकारात्मक विचार निर्माण होतात. तसेच भीती आणि नकारात्मकता दूर होऊन मानसिक शांती मिळते, असे मानले जाते.
हनुमान चालीसा पठणाचे महत्त्वाचे नियम
स्वच्छतेची काळजी घ्या : हनुमान चालीसाचे पठण करण्यापूर्वी स्नान करा आणि स्वच्छ कपडे परिधान करा.
हनुमानजींच्या समोर बसून पठण करा : बजरंगबलींच्या फोटो किंवा मूर्तीसमोर आसन अंथरून बसावे आणि श्रद्धेने पठण करावे.
दिवा लावा : पठण सुरू करण्यापूर्वी हनुमानजींसमोर दिवा लावून मनोभावे पूजा करावी.
मन शांत ठेवा : हनुमान चालीसा म्हणताना मनात चुकीचे विचार आणू नयेत. संपूर्ण लक्ष पठणावर केंद्रित करावे.
योग्य उच्चार करा : चालीसेतील चौपाया घाईघाईने म्हणण्याऐवजी प्रत्येक शब्दाचा योग्य उच्चार करून पठण करावे.
लाल रंगाचे महत्त्व : धार्मिक मान्यतेनुसार, हनुमानजींना लाल रंग प्रिय आहे. त्यामुळे पूजेदरम्यान त्यांना लाल फुले अर्पण करू शकता.
नियमित पठण करा : दररोज हनुमान चालीसाचे पठण करणे शुभ मानले जाते. दररोज शक्य नसेल, तर किमान मंगळवार आणि शनिवार या दिवशी पठण करू शकता.