Opendoor India Shutdown: जागतिक स्तरावर तंत्रज्ञान क्षेत्रात सुरू असलेल्या बदलांचा फटका आता भारतातील कर्मचाऱ्यांनाही बसू लागला आहे. अमेरिकेतील प्रसिद्ध रिअल इस्टेट टेक कंपनी ओपनडोर (Opendoor) ने भारतातील आपले संपूर्ण कामकाज बंद करण्याचा निर्णय घेतला आहे. या निर्णयामुळे कंपनीच्या भारतीय कार्यालयांमध्ये कार्यरत असलेल्या सुमारे 250 कर्मचाऱ्यांना नोकरी गमवावी लागली आहे.
कंपनीचे मुख्य कार्यकारी अधिकारी (CEO) काज नेजतियन यांनी या निर्णयामागची कारणे स्पष्ट करताना सांगितले की, ओपनडोरचे बहुतांश ग्राहक अमेरिकेत आहेत. त्यामुळे ग्राहकांच्या अधिक जवळ राहून काम करण्यासाठी कंपनीने अनेक महत्त्वाच्या जबाबदाऱ्या पुन्हा अमेरिकेत हलवण्याचा निर्णय घेतला आहे. गेल्या काही महिन्यांपासून ही प्रक्रिया सुरू होती आणि आता भारतातील संपूर्ण ऑपरेशन बंद केले आहे.
काज नेजतियन यांनी सोशल मीडिया प्लॅटफॉर्म X वर कर्मचाऱ्यांसाठी लिहिलेला मेसेजही शेअर केला. त्यामध्ये त्यांनी स्पष्ट केले की, व्यवसायाच्या गरजा लक्षात घेता कंपनीची सेवा देणारी टीम ग्राहकांच्या जवळ असणे अधिक फायदेशीर ठरते. त्यामुळे अनेक विभाग पुन्हा अमेरिकेत स्थलांतरित करण्यात आले आहेत.
मात्र या निर्णयामागे केवळ व्यवसायिक धोरणच नाही, तर कृत्रिम बुद्धिमत्ता (AI) आणि ऑटोमेशनचाही मोठा प्रभाव असल्याचे समोर आले आहे. यापूर्वी कंपनीने भारतात मोठी टीम उभी केली होती. माहितीची देवाणघेवाण, डेटा व्यवस्थापन आणि इतर अनेक मॅन्युअल प्रक्रिया भारतीय कर्मचारी सांभाळत होते. परंतु आता AI आधारित साधनांमुळे ही अनेक कामे सोपी झाली आहेत.
कंपनीच्या म्हणण्यानुसार, अमेरिकेतील तुलनेने छोट्या टीम्स आता AI च्या मदतीने पूर्वी मोठ्या मनुष्यबळाकडून केली जाणारी कामे अधिक वेगाने आणि कार्यक्षमतेने पूर्ण करू शकतात. त्यामुळे परदेशात मोठ्या प्रमाणावर काम आउटसोर्स करण्याची गरज कमी झाली आहे.
दरम्यान, कंपनीने या निर्णयाचा संबंध भारतीय कर्मचाऱ्यांच्या कामगिरीशी नसल्याचे स्पष्ट केले आहे. काज नेजतियन यांनी भारतीय टीमचे कौतुक करत त्यांना अत्यंत कुशल आणि प्रतिभावान कर्मचारी म्हटले आहे. त्यांनी या कर्मचाऱ्यांचे योगदान महत्त्वाचे असल्याचे सांगत भविष्यात ते इतर संस्थांसाठीही मोलाचे ठरतील, असा विश्वास व्यक्त केला.
नोकरी गमावलेल्या कर्मचाऱ्यांना कंपनीकडून सेव्हरन्स पॅकेज, करिअर मार्गदर्शन आणि नवीन नोकरी शोधण्यासाठी आवश्यक मदत केली जाणार आहे.
ओपनडोरचा हा निर्णय केवळ एका कंपनीपुरता मर्यादित नसून जागतिक रोजगार बाजारासाठी मोठा संकेत मानला जात आहे. AI आणि ऑटोमेशनमुळे पारंपरिक नोकऱ्यांचे स्वरूप वेगाने बदलत आहे.
