अनेकदा आपण म्युच्युअल फंडात SIP (सिस्टिमॅटिक इन्व्हेस्टमेंट प्लॅन) किंवा एकरकमी पैसे गुंतवतो आणि काही काळानंतर ते आपल्या लक्षातही राहत नाही. जर तुमच्यासोबतही असे झाले असेल, तर ही बातमी तुमच्यासाठीच आहे. आता तुम्ही फक्त तुमचा पॅन नंबर वापरून तुमच्या सर्व गुंतवणुकीचा अगदी सहजपणे मागोवा घेऊ शकता.
पॅन नंबर हा केवळ कर भरण्यासाठी नसतो, तर तो तुमच्या प्रत्येक म्युच्युअल फंड गुंतवणुकीला एकमेकांशी जोडतो. तुम्ही कितीही वेगवेगळ्या फंडांमध्ये पैसे गुंतवले असले तरी, पॅन कार्डमुळे तुमची सर्व माहिती एकाच ठिकाणी उपलब्ध होते. यामुळे केवळ गुंतवणुकीचा हिशोब ठेवणे सोपे होत नाही, तर कर आणि भांडवली नफ्याची (Capital Gain) गणना करणेही सोपे होते.
सेबीच्या (SEBI) नियमांमुळे आणि डिजिटल तंत्रज्ञानामुळे आता तुम्हाला प्रत्येक फंडाच्या वेबसाइटवर जाऊन लॉग-इन करण्याची गरज नाही. कन्सोलिडेटेड अकाउंट स्टेटमेंट (CAS) नावाच्या एका रिपोर्टमुळे तुम्ही तुमच्या पॅन नंबरशी जोडलेल्या सर्व म्युच्युअल फंड गुंतवणुकीची माहिती एकाच ठिकाणी पाहू शकता.
या रिपोर्टमधून तुम्हाला खालील गोष्टी कळतात:
तुम्ही कधी आणि कोणत्या फंडात गुंतवणूक केली आहे?
तुमच्याकडे त्या फंडाचे किती युनिट्स आहेत?
तुमच्या गुंतवणुकीचे सध्याचे मूल्य किती आहे?
तुमची SIP अजून चालू आहे की बंद झाली आहे?
गुंतवणुकीवर आतापर्यंत एकूण किती परतावा मिळाला आहे?
ही प्रक्रिया अतिशय सोपी आहे. खालील स्टेप्स फॉलो करा:
स्टेप-१: MF Central, CAMS Online, KFintech, NSDL किंवा CDSL यापैकी कोणत्याही एका वेबसाइटवर जा.
स्टेप-२: 'Request CAS' किंवा 'View Portfolio' अशा पर्यायावर क्लिक करा.
स्टेप-३: तुमचा पॅन नंबर, नोंदणीकृत (Registered) ईमेल आयडी किंवा मोबाईल नंबर आणि आवश्यक असल्यास जन्मतारीख टाका.
स्टेप-४: तुम्हाला एक OTP येईल, तो टाकून तुम्ही तुमचा रिपोर्ट पाहू शकता.
स्टेप-५: तुम्ही हा रिपोर्ट एकदाच पाहू शकता किंवा दर महिन्याला तुमच्या ईमेलवर मागवण्याची सुविधा निवडू शकता.
कधीकधी या प्रक्रियेनंतरही तुमची गुंतवणुकीची माहिती दिसत नाही. याचे कारण म्हणजे तुमची गुंतवणूक दुसऱ्या पॅन नंबरशी जोडलेली असू शकते किंवा तुमची KYC प्रक्रिया अपूर्ण असू शकते. अशावेळी, CAMS किंवा KFintech च्या वेबसाइटवर जाऊन आधार कार्ड वापरून eKYC पूर्ण करा. त्यानंतर तुमचा पोर्टफोलिओ अपडेट होईल.
मार्च २०२४ मध्ये सेबीने MITRA (Mutual fund Investment Tracing and Reclaim Application) नावाचा एक नवीन प्लॅटफॉर्म सुरू केला आहे. जर तुम्हाला वाटत असेल की तुम्ही पूर्वी कधीतरी गुंतवणूक केली होती आणि आता ती विसरला आहात, तर 'मित्र' प्लॅटफॉर्मवर तुमचा पॅन नंबर आणि जन्मतारीख टाकून तुम्ही जुनी गुंतवणूक शोधू शकता. ज्यांना वारसा हक्काने गुंतवणूक मिळाली आहे किंवा ज्यांनी २०१० पूर्वी ऑफलाइन पद्धतीने गुंतवणूक केली होती, त्यांच्यासाठी हे विशेषतः उपयुक्त आहे.
