देशांतर्गत शेअर बाजारात आज ( दि. १६ जून) आठवड्याच्या पहिल्या दिवशी हिरवळ दिसून आली. सुरुवातीच्या ट्रेडिंगमध्ये सेन्सेक्स २८८.७९ अंकांनी वाढून ८१,४०७.३९ वर तर निफ्टी ९८.९ अंकांनी वाढून २४,८१७.५० वर पोहोचला. अमेरिकन डॉलरच्या तुलनेत रुपया ११ पैशांनी घसरून ८६.२२ वर पोहोचला.
दोन दिवसांच्या घसरणीनंतर, १६ जून रोजी निफ्टी आणि सेन्सेक्स थोड्याशा वाढीसह उघडले. गिफ्ट निफ्टी आधीच सकारात्मक सुरुवात दर्शवत होता, सुरुवातीच्या व्‍यवहारात जोरदार विक्रीनंतर, निफ्टी ऑटो, रिअल्टी आणि पीएसयू बँक समभागांमध्ये विक्री दिसून आली, परंतु उर्वरित क्षेत्रांमध्ये वेगाने व्यवहार होताना दिसून आले. दरम्‍यान, इस्रायल आणि इराणमधील भू-राजकीय तणाव अजूनही सुरू आहे. सोमवारी तेलाच्या किमतीत वाढ दिसून येत आहे. शुक्रवारी ही वाढ आजही सुरू आहे. आठवड्याच्या शेवटी इस्रायल आणि इराणने पुन्हा केलेल्या हल्ल्यांमुळे चिंता निर्माण झाली आहे की हा संघर्ष संपूर्ण प्रदेशात पसरू शकतो आणि मध्य पूर्वेकडून तेल पुरवठ्यात मोठा अडथळा निर्माण होऊ शकतो.
मध्य पूर्वेतील वाढत्या तणावामुळे आणि सततच्या जागतिक व्यापार अनिश्चिततेमुळे बेंचमार्क निर्देशांक सलग दुसऱ्या व्यापार सत्रात घसरत राहिले, ज्यामुळे गुंतवणूकदारांचा विश्वास डळमळीत झाला. शुक्रवारी ( दि. १३ जून )बाजारात जोरदार विक्री दिसून आली, सर्व प्रमुख क्षेत्रीय निर्देशांक लाल रंगात बंद झाले होते. १३ जून रोजी, एफआयआयंनी १.२६४ कोटी रुपयांचे शेअर्स विकले, तर देशांतर्गत संस्थात्मक गुंतवणूकदारांनी ३,०४१ कोटी रुपयांचे शेअर्स खरेदी केले. या वर्षी आतापर्यंत, एफआयआयंनी १.२६ लाख कोटी रुपयांचे शेअर्स विकले आहेत, तर डीआयआयंनी ३.१९ लाख कोटी रुपयांचे शेअर्स खरेदी केले आहेत.शुक्रवारी अमेरिकन शेअर बाजारात मोठी घसरण दिसून आली. डाउ जोन्स ७७० अंकांनी बंद झाला, तर टेक कंपन्यांनी भरलेला नॅस्डॅक निर्देशांकही २५० अंकांनी घसरून दिवसाच्या नीचांकी पातळीवर बंद झाला होता.
सोमवारची सुरुवात थोडी चांगली झाली. गिफ्ट निफ्टी ५० अंकांनी वाढून २४८०० च्या जवळ पोहोचला. त्याच वेळी, यूएस डाउ फ्युचर्समध्येही ५० अंकांनी वाढ झाली. जपानचा निक्केई निर्देशांकही ३०० अंकांनी वाढला आहे. दरम्‍यान, सोन्याच्या किमतीत प्रचंड वाढ झाली आहे. देशांतर्गत बाजारात सोने १९०० रुपयांनी वाढून १ लाख ७०० रुपयांच्या जवळपास पोहोचले आहे, जे आतापर्यंतचे विक्रमी उच्चांक आहे. कच्चे तेलही १ टक्क्यांनी वाढून ७५ डॉलर्स प्रति बॅरलच्या वर व्यवहार करत आहे.
