Stock Market Rally: भारतीय शेअर बाजारातील तेजीचा प्रवास बुधवारीही कायम राहिला. सलग तीन सत्रे वाढीसह बंद झाल्यानंतर आज बाजाराने सकारात्मक सुरुवात केली. निफ्टी 55 अंकांच्या वाढीसह 24,044 वर उघडला, तर सेन्सेक्स 271 अंकांनी वाढून 77,080 वर पोहोचला. त्यामुळे गुंतवणूकदारांमध्ये पुन्हा एकदा उत्साहाचे वातावरण निर्माण झाले आहे.
गेल्या तीन ट्रेडिंग सत्रांमध्ये निफ्टीने तब्बल 828 अंकांची वाढ घेतली आहे. मंगळवारीही निफ्टी 135 अंकांनी वाढून 23,989 वर बंद झाला होता. यामुळे बाजारातील तेजीचा कल अधिक मजबूत होत असल्याचे संकेत मिळत आहेत.
सकाळच्या व्यवहारात आयटी, कंझ्युमर ड्युरेबल्स आणि मीडिया क्षेत्रातील शेअर्समध्ये खरेदीचा जोर दिसून आला. दुसरीकडे ऑटो, मेटल आणि रिअल्टी क्षेत्रावर दबाव कायम होता. निफ्टीमधील टॉप गेनर्समध्ये ट्रेंट, इन्फोसिस, टेक महिंद्रा आणि विप्रो यांचा समावेश होता. तर हिंदाल्को, टाटा मोटर्स पॅसेंजर व्हेईकल्स आणि अॅक्सिस बँक या शेअर्समध्ये घसरण दिसून आली.
कॉर्पोरेट घडामोडींमुळे काही शेअर्स विशेष चर्चेत राहिले. इन्फोसिसने आयटी ऑपरेशन्स अधिक कार्यक्षम करण्यासाठी Valmet सोबत भागीदारी केली आहे. विप्रोने बेंगळुरूमधील आपल्या इनोव्हेशन हबमध्ये Anthropic च्या क्लाऊड मॉडेल्सवर आधारित ‘Applied AI Center of Excellence’ सुरू केले आहे.
भारत फोर्जच्या संरक्षण विभागाने KSSL आणि Paramount यांच्या सहकार्याने Eurosatory 2026 मध्ये ‘सिम्हा 4x4’ हे अत्याधुनिक लाइट आर्मर्ड मल्टी-पर्पज वाहन सादर केले. झायडस लाइफसायन्सेसने Assertio Holdings मधील 66.32 टक्के हिस्सा विकत घेण्याची प्रक्रिया पूर्ण केली आहे. तसेच टीसीएसने इंग्लंडमधील टॉटनहॅम हॉटस्पर फुटबॉल क्लबसोबत डिजिटल ट्रान्सफॉर्मेशन भागीदारी केली आहे.
बाजारातील सकारात्मक वातावरणामागे दोन प्रमुख कारणे असल्याचे तज्ज्ञांचे मत आहे. आंतरराष्ट्रीय बाजारात कच्च्या तेलाच्या किंमती 80 डॉलरच्या खाली आल्या आहेत. त्यामुळे भारतातील महागाई, रुपयावरील दबाव आणि आर्थिक वाढीवरील चिंता काही प्रमाणात कमी होऊ शकतात. याशिवाय जागतिक अनिश्चितता कमी झाल्याने परदेशी संस्थात्मक गुंतवणूकदारांची (FII) विक्रीही आटोक्यात आली आहे. यामुळे भारतीय बाजारातील गुंतवणूकदारांचा आत्मविश्वास वाढला आहे.
तांत्रिक विश्लेषकांच्या मते, निफ्टीसाठी 24,030 हा महत्त्वाचा स्तर आहे. हा स्तर टिकून राहिल्यास निर्देशांक 24,300 ते 24,380 या पातळीपर्यंत जाऊ शकतो. तर नफा-वसुली वाढल्यास 23,880 ते 23,800 हा मजबूत सपोर्ट झोन मानला जात आहे.
एचडीएफसी सिक्युरिटीजचे तज्ज्ञ नागराज शेट्टी यांच्या मते, बाजाराचा एकूण कल अद्याप सकारात्मक आहे. निफ्टी 24,000 ते 24,100 च्या वर टिकून राहिल्यास पुढील काळात 24,500 च्या दिशेने वाटचाल होऊ शकते. त्यामुळे सध्या बाजारातील तेजी कायम राहण्याची शक्यता व्यक्त केली जात आहे.
