पुढारी ऑनलाईन डेस्क : कमकुवत कॉर्पोरेट कमाई, अमेरिकेच्या व्यापार धोरणाबाबत अनिश्चितता आणि परदेशी गुंतवणूकदारांकडून सतच्या विक्रीचे पडसाद सोमवारी (दि.२७) भारतीय शेअर बाजारात (Stock Market) उमटले. सेन्सेक्स (Sensex) तब्बल ८२४ अंकांनी घसरून ७५,३६६ वर बंद झाला. तर निफ्टी ५० निर्देशांक (Nifty) २६३ अंकांच्या घसरणीसह २२,८२९ वर स्थिरावला. सेन्सेक्स, निफ्टीची आजची घसरण अनुक्रमे १.०८ टक्के आणि १.१४ टक्के एवढी राहिली. आज बाजारात चौफेर विक्री दिसून आली. यामुळे निर्देशांक आठ महिन्यांच्या निच्चांकावर पोहोचले.
सर्व १३ क्षेत्रीय निर्देशांक आज घसरले. निफ्टी एनर्जी, आयटी, मेटल, मीडिया, ऑइल अँड गॅस आणि फार्मा हे निर्देशांक २ ते ५ टक्क्यांनी घसरले. बीएसई मिडकॅप २.६ टक्के आणि स्मॉलकॅप ३.५ टक्के घसरला.
दरम्यान, बाजारातील मोठ्या घसरणीमुळे आज २७ जानेवारी रोजी बीएसई सूचीबद्ध कंपन्यांचे बाजार भांडवल ९.३५ लाख कोटींनी कमी होऊन ४१०.१६ लाख कोटींवर आले. याआधी २४ जानेवारी रोजी एकूण बाजार भांडवल ४१९.५१ लाख कोटी रुपये होते. याचाच अर्थ आज गुंतवणूकदारांना ९.३५ लाख कोटींचा फटका बसला.
सेन्सेक्सवर एचसीएल टेकचा (HCL Tech Share Price) शेअर्स ४.६ टक्के घसरला. त्याचबरोबर झोमॅटो ४.४ टक्के, टेक महिंद्रा ४ टक्के, पॉवर ग्रिड २.९ टक्के, इन्फोसिस २.८ टक्के, टाटा मोटर्स २.८ टक्के, टाटा स्टील २.७ टक्के, इंडसइंड बँक २.५ टक्के, टीसीएसचा शेअर्स २ टक्के घसरला. दरम्यान, आयसीआयसीआय बँक शेअर्स १.५ टक्के वाढला. हिंदुस्तान युनिलिव्हर, एम अँड एम, एसबीआय हे शेअर्सही हिरव्या रंगात बंद झाले.
अमेरिकेचे राष्ट्राध्यक्ष डोनाल्ड ट्रम्प यांनी कोलंबियावर २५ टक्के शुल्क आणि निर्बंध लागू करण्याची घोषणा केली. अमेरिकेच्या या धोरणात्मक अनिश्चिततेचा जगभरातील बाजारात दबाव दिसून येत आहे. परिणामी शेअर बाजारात मोठी घसरण झाली आहे. कार्पोरेट कंपन्यांच्या कमकुवत कमाईचादेखील बाजारावर परिणाम दिसून येत आहे. तसेच परदेशी गुंतवणूकदारांकडून विक्रीचा सपाटा सुरुच आहे. जानेवारी २०२५ पर्यंत परदेशी गुंतवणूकदारांनी ६४,१५६ कोटी रुपयांच्या भारतीय शेअर्सची विक्री केली आहे. याचाही बाजारात दबाव राहिला आहे.
आजची घसरण पाहाता केंद्रीय अर्थसंकल्प २०२५ च्या आधी गुंतवणूकदारांनी सावध भूमिका घेतल्याचे स्पष्ट होते.
