Post Office RD Scheme Explained: जर तुम्ही गुंतवणुकीचा विचार करत असाल आणि खात्रीशीर परतावा मिळावा असे वाटत असेल, तर पोस्ट ऑफिसची बचत योजना तुमच्यासाठी फायदेशीर ठरू शकते. सरकारतर्फे चालवल्या जाणाऱ्या या योजनांमध्ये गुंतवणुकीवर पूर्ण सुरक्षिततेची हमी असते. अशाच योजनांपैकी एक म्हणजे Post Office रिकरिंग डिपॉझिट (RD) योजना.
या योजनेत रोज 400 रुपये वाचवून, लाँगटर्ममध्ये तब्बल 20 लाख रुपयांचा फंड उभारता येतो. ही योजना सर्वसामान्य गुंतवणूकदारांसाठी कशी फायदेशीर आहे, ते समजून घेऊया.
पोस्ट ऑफिसच्या बचत योजनांवरील व्याजदर दर तीन महिन्यांनी बदलतात. सध्या पोस्ट ऑफिस RD योजनेवर 5 वर्षांसाठी 6.70 टक्के वार्षिक व्याज दिलं जातं. या योजनेत खाते उघडण्यासाठी किमान 100 रुपयांपासून गुंतवणूक सुरू करता येते. नियमित आणि शिस्तबद्ध गुंतवणुकीमुळे छोट्या रकमेचंही मोठ्या निधीत रूपांतर होऊ शकतं.
या योजनेचा मॅच्युरिटी कालावधी 5 वर्षांचा आहे. मात्र, गुंतवणूकदार इच्छित असल्यास ही योजना पुढील 5 वर्षांसाठी वाढवू शकतो. विशेष म्हणजे, 10 वर्षांवरील अल्पवयीन मुलाचंही खाते पालकांच्या मदतीने उघडता येतं. वयाची 18 वर्षे पूर्ण झाल्यानंतर नवीन केवायसी करून खाते स्वतः चालवता येतं.
होय. काही कारणामुळे गुंतवणूकदाराला खाते मुदतपूर्तीपूर्वी बंद करायचं असल्यास, 3 वर्षांनंतर प्री-मॅच्युअर क्लोजरची सुविधा उपलब्ध आहे. तसेच खातेदाराचा मृत्यू झाल्यास, नामनिर्देशित व्यक्ती (Nominee) ही रक्कम क्लेम करू शकते किंवा खाते पुढे सुरूही ठेवू शकते.
या योजनेत आणखी एक मोठा फायदा म्हणजे कर्ज सुविधा. खाते सुरू करून एक वर्ष पूर्ण झाल्यानंतर जमा रकमेच्या 50 टक्क्यांपर्यंत कर्ज घेता येतं. या कर्जावर सुमारे 2 टक्के व्याज आकारलं जातं. खाते उघडण्यासाठी तुमच्या जवळच्या कोणत्याही पोस्ट ऑफिसमध्ये जाऊ शकता.
जर एखादा गुंतवणूकदार दररोज 400 रुपये वाचवतो, म्हणजेच महिन्याला 12,000 रुपये, आणि ते पोस्ट ऑफिस RD योजनेत गुंतवतो, तर 5 वर्षांनंतर एकूण रक्कम सुमारे 8.56 लाख रुपये होते. हीच योजना पुढील 5 वर्षांसाठी वाढवली, तर
एकूण गुंतवणूक: 14.40 लाख रुपये होते.
मिळणारा एकूण निधी: सुमारे 20.50 लाख रुपये
यातील 6.10 लाखांहून अधिक रक्कम ही फक्त व्याजाची कमाई असते.
पोस्ट ऑफिसची रिकरिंग डिपॉझिट योजना ही सुरक्षित, खात्रीशीर आणि लाँगटर्म बचतीसाठी उत्तम पर्याय आहे. नियमित गुंतवणूक आणि संयम ठेवल्यास, छोट्या रकमेतूनही मोठं आर्थिक उद्दिष्ट गाठता येऊ शकतं.
टीप: कोणतीही गुंतवणूक करण्यापूर्वी तज्ज्ञांचा सल्ला नक्की घ्या.
