Bengaluru Couple Food Startup: मोठ्या पगाराची नोकरी, चांगले करिअर आणि सुरक्षित भविष्य असूनही अनेक तरुणांना स्वतःचा व्यवसाय सुरू करण्याची इच्छा असते. मात्र, त्यासाठी नेमकं काय करावं, हा प्रश्न अनेकांसमोर असतो. बंगळुरूमधील दिया कृष्णकुमार आणि आदित्य नटराजन या जोडप्याने आपल्या रोजच्या आयुष्यातील एका समस्येतूनच व्यवसायाची कल्पना शोधली.
दोघेही आयटी क्षेत्रात नोकरी करत होते. दिवसभर काम केल्यानंतर घरी स्वयंपाक करण्यासाठी त्यांच्याकडे वेळ उरत नव्हता. बाहेरून जेवण मागवणे हा पर्याय होता. मात्र, रोजच्या जेवणासाठी आरोग्यदायी, परवडणारे आणि घरगुती चवीचे पदार्थ मिळणे कठीण होते. याच समस्येवर उपाय शोधताना त्यांनी नोकरी सोडून स्वतःचा व्यवसाय सुरू करण्याचा निर्णय घेतला.
सप्टेंबर २०२४ मध्ये त्यांनी आयटी क्षेत्रातील नोकरी सोडली आणि बंगळुरूमध्ये 'वेलफेड' (Wellfed) नावाचा हेल्दी फूड सबस्क्रिप्शन व्यवसाय सुरू केला. अवघ्या १५ लाख रुपयांच्या सुरुवातीच्या गुंतवणुकीतून सुरू झालेल्या या व्यवसायाने जानेवारी ते सप्टेंबर २०२६ या नऊ महिन्यांत तब्बल ५६ लाख रुपये कमावले आहेत. आतापर्यंत या कंपनीने १,५०० हून अधिक ग्राहकांपर्यंत पोहोचत ५५ हजारांपेक्षा जास्त जेवणाचे डबे वितरित केले आहेत.
दिया आणि आदित्य या दोघांनीही बंगळुरूमध्ये कॉम्प्युटर सायन्सचे शिक्षण घेतले. त्यानंतर दोघांनी एकाच आयटी कंपनीत कामाला सुरुवात केली. कॉर्पोरेट क्षेत्रात तीन वर्षांहून अधिक काळ काम केल्यानंतर त्यांना एक गोष्ट प्रकर्षाने जाणवली. दिवसभराच्या कामामुळे जेवणाच्या वेळा सांभाळणे आणि घरी स्वयंपाक करणे कठीण होत होते.
काही दिवस बाहेरून जेवण मागवावे लागायचे, तर कधी रात्रीचे जेवण बनवण्यासाठीही वेळ मिळत नव्हता. विशेष म्हणजे, इंटरनेटवर एखादा पदार्थ २० मिनिटांत तयार होतो, असे सांगितले जात असले तरी प्रत्यक्ष स्वयंपाक करताना त्यासाठी दुप्पट वेळ लागत असल्याचे दिया यांना जाणवले.
त्यामुळे दोघांनी दुपारचे आणि रात्रीचे जेवण घरपोच देणाऱ्या सबस्क्रिप्शन सेवांचा शोध सुरू केला. मात्र, त्यांना अपेक्षित असलेली सेवा मिळाली नाही. अनेक ठिकाणी वेगवेगळ्या प्रकारचे पदार्थ आणि परदेशी खाद्यपदार्थ उपलब्ध होते. पण रोजच्या जेवणात लागणारी साधी डाळ, भाजी, पोळी आणि प्रथिनयुक्त पदार्थ सहज मिळत नव्हते.
त्यांना रोजच्या घरगुती जेवणाची चव देणारी आणि खिशाला परवडणारी सेवा सुरू करायची होती. बाजारात अशी सेवा सहज उपलब्ध नसल्याचे लक्षात आल्यानंतर त्यांनी स्वतःच हा व्यवसाय सुरू करण्याचा निर्णय घेतला.
सप्टेंबर २०२४ मध्ये दिया आणि आदित्य यांनी १५ लाख रुपयांची गुंतवणूक करून 'वेलफेड' सुरू केले. या गुंतवणुकीतील बहुतांश रक्कम त्यांनी स्वतःच्या बचतीतून उभी केली होती.
सुरुवातीला त्यांच्या टीममध्ये सहा जण होते. यामध्ये दोन्ही संस्थापक, एक आहारतज्ज्ञ, एक स्वयंपाकी, एक मदतनीस आणि एक डिलिव्हरी कर्मचारी यांचा समावेश होता.
ग्राहकांना केवळ चविष्ट नव्हे, तर पोषणमूल्यांचा विचार करून तयार केलेले जेवण मिळावे, यासाठी त्यांनी आहारतज्ज्ञाची मदत घेतली. प्रत्येक पदार्थातील पोषणमूल्ये आणि त्याचे प्रमाण ठरवण्यावर भर देण्यात आला.
सुरुवातीला त्यांनी मित्र आणि कुटुंबीयांना जेवण पाठवून त्यांचा अभिप्राय घेतला. मिळालेल्या प्रतिसादानंतर त्यांनी अधिक ग्राहकांपर्यंत पोहोचण्यास सुरुवात केली.
वेलफेडच्या मेन्यूमध्ये डाळ, ज्वारीची भाकरी, अद्रक चिकन आणि छोले चाट अशा पदार्थांचा समावेश आहे. याशिवाय पनीर, टोफू, सोया आणि चिकन यांसारखे प्रथिनेयुक्त पदार्थही दिले जातात. ग्राहकांच्या आवडीनुसार रॅप्स, बिर्याणी आणि इंडो-चायनीज पदार्थांचाही पर्याय उपलब्ध आहे.
कोणत्याही नव्या व्यवसायासाठी सुरुवातीचे ग्राहक मिळवणे हे मोठे आव्हान असते. वेलफेडच्या बाबतीत सोशल मीडियाने महत्त्वाची भूमिका बजावली.
बंगळुरूमधील एका आहारतज्ज्ञाने या स्टार्टअपबद्दल सोशल मीडियावर रील शेअर केली. या रीलमुळे कंपनीला पहिले १०० ग्राहक मिळवण्यात मदत झाली.
पॅकेजिंगच्या बाबतीतही संस्थापकांनी वेगळा विचार केला. नेहमीच्या प्लास्टिक किंवा डिस्पोजेबल डब्यांऐवजी त्यांनी स्टीलच्या डब्यांची निवड केली. हे डबे महाराष्ट्रातील एका उत्पादकाकडून तयार करून घेतले जातात.
वेलफेडने पहिल्या वर्षात सुमारे ४५ लाख रुपयांचा महसूल मिळवला होता. त्यानंतर जानेवारी ते सप्टेंबर २०२६ या नऊ महिन्यांत कंपनीने ५६ लाख रुपयांचा महसूल मिळवला.
मात्र, हा प्रवास सोपा नव्हता. २०२६ च्या सुरुवातीला एलपीजीच्या तुटवड्याचा परिणाम त्यांच्या स्वयंपाकघरातील कामकाजावर झाला. गॅस उपलब्धतेच्या अडचणींमुळे त्यांना मेन्यूमध्ये बदल करावे लागले. याचा परिणाम व्यवसायाच्या वाढीवरही झाला.
सध्या वेलफेडकडून ग्राहकांसाठी तीन प्रकारचे प्लॅन आहेत
तीन दिवसांची ट्रायल योजना: २८९ रुपये.
दोन आठवड्यांची योजना: २७९ रुपये.
मासिक योजना: २६९ रुपये.
या योजनांमध्ये दुपारचे आणि रात्रीचे जेवण, मोफत डिलिव्हरी आणि आहारतज्ज्ञांचे मार्गदर्शन दिले जाते.
बंगळुरूमध्ये मिळालेल्या प्रतिसादानंतर दिया आणि आदित्य यांनी व्यवसायाचा विस्तार करण्याचे नियोजन केले आहे. शहरातील अधिक भागांमध्ये जेवण पोहोचवणे आणि स्वयंपाकघराची क्षमता वाढवणे हे त्यांचे पुढील उद्दिष्ट आहे.
सध्या कंपनीचे ग्राहक प्रामुख्याने आयटी आणि स्टार्टअप क्षेत्रातील भागांमध्ये आहेत. मात्र, आता शहरातील इतर भागांमधील ग्राहकांपर्यंतही पोहोचण्याचा त्यांचा प्रयत्न आहे.
याशिवाय ग्राहकांच्या गरजेनुसार वेगवेगळ्या आहाराचे पर्याय, अधिक प्रथिने असलेले पदार्थ आणि नवीन खाद्यपदार्थ मेन्यूमध्ये आणण्याचा त्यांचा प्लॅन आहे. बंगळुरूनंतर हैदराबादमध्येही व्यवसाय सुरू करण्याचा विचार संस्थापक करत आहेत.
दिया आणि आदित्य यांचा प्रवास एका साध्या समस्येतून सुरू झाला. नोकरीमुळे घरचे जेवण बनवण्यासाठी वेळ मिळत नव्हता. पण याच समस्येकडे त्यांनी व्यवसायाची संधी म्हणून पाहिले. १५ लाख रुपयांच्या गुंतवणुकीतून सुरू झालेल्या या व्यवसायाने अवघ्या नऊ महिन्यांत ५६ लाख रुपयांचा महसूल मिळवला.
विशेष म्हणजे, त्यांच्या या प्रयत्नातून आतापर्यंत ५५ हजारांहून अधिक जेवणाचे डबे ग्राहकांपर्यंत पोहोचले आहेत. स्वतःची गरज ओळखून त्यावर उपाय शोधला, तर त्यातून यशस्वी व्यवसायही उभा राहू शकतो, हे या जोडप्याने दाखवून दिले आहे.