Google Employees Quitting: एकेकाळी Google मध्ये नोकरी मिळणे हे प्रत्येक इंजिनिअर आणि आयटी क्षेत्रात करिअर करू इच्छिणाऱ्या तरुणांचे स्वप्न होते. आकर्षक पगार, मोफत जेवण, आलिशान ऑफिस, उत्तम सुविधा आणि जागतिक दर्जाचे कामाचे वातावरण यामुळे Google ही 'ड्रीम कंपनी' म्हणून ओळखली जात होती. मात्र, कृत्रिम बुद्धिमत्ता (AI) क्षेत्रातील वेगवान बदलांमुळे आता हे चित्र झपाट्याने बदलताना दिसत आहे.
आता परिस्थिती अशी आहे की, वर्षाला तब्बल 8 कोटी रुपयांपर्यंत पगार मिळणारे काही कर्मचारीही Google सोडून OpenAI, Anthropic आणि इतर AI स्टार्टअप्सकडे वळत आहेत. यामागे नेमकी कोणती कारणे आहेत, ते जाणून घेऊया.
तज्ज्ञांच्या मते, AI क्षेत्रातील नव्या कंपन्या कर्मचाऱ्यांना केवळ पगारच देत नाहीत, तर कंपनीतील शेअर्स (Equity) देखील देतात.
जर अशा स्टार्टअपला भविष्यात मोठे यश मिळाले, तर त्या शेअर्सचे मूल्य अनेक पटींनी वाढू शकते. त्यामुळे अनेक टेक प्रोफेशनल्सना वाटते की, सुरुवातीच्या टप्प्यात AI स्टार्टअपमध्ये गेल्यास भविष्यात प्रचंड आर्थिक फायदा मिळू शकतो.
Google मध्ये निश्चित आणि मोठा पगार मिळत असला, तरी AI स्टार्टअपमधील इक्विटीमुळे त्यापेक्षा कितीतरी मोठी संपत्ती निर्माण होण्याची शक्यता असल्याने अनेक कर्मचारी हा पर्याय स्वीकारत आहेत.
Google ही एकेकाळी स्थिर आणि सुरक्षित नोकरीसाठी प्रसिद्ध होती. मात्र, गेल्या काही वर्षांत कंपनीने मोठ्या प्रमाणावर कर्मचारी कपात केली.
2023 मध्ये हजारो कर्मचाऱ्यांना कामावरून कमी करण्यात आले. त्यानंतरही विविध विभागांमध्ये काही प्रमाणात कर्मचारी कपात सुरूच राहिली. त्यामुळे मोठ्या टेक कंपन्यांमध्येही नोकरी पूर्णपणे सुरक्षित राहिलेली नाही, अशी भावना अनेक कर्मचाऱ्यांमध्ये निर्माण झाली आहे.
मोठ्या तंत्रज्ञान कंपन्यांमध्ये लाखो कर्मचारी काम करत असल्याने प्रत्येक कर्मचाऱ्याची भूमिका मर्यादित असते. अनेकांना आपल्या कामाचा थेट परिणाम दिसत नाही किंवा महत्त्वाचे निर्णय घेण्याची संधी मिळत नाही.
याउलट AI स्टार्टअपमध्ये कमी लोकांची टीम असल्याने प्रत्येक व्यक्तीला अधिक जबाबदारी मिळते. नवीन कल्पना लगेच प्रत्यक्षात आणण्याची संधी मिळते आणि कामाचा परिणामही थेट दिसून येतो. यामुळे अनेक तरुण सुरक्षित नोकरीपेक्षा आव्हानात्मक आणि नाविन्यपूर्ण कंपन्यांची निवड करत आहेत.
अहवालानुसार, Google ने अलीकडच्या काळात काही खर्च कमी करण्याचे निर्णय घेतले आहेत. काही कार्यालयांमधील कॅफेटेरियाच्या वेळा कमी करण्यात आल्या, प्रवासासाठीचे बजेट कमी करण्यात आले आणि टीम इव्हेंट्सवरील खर्चातही कपात करण्यात आली.
याशिवाय वर्क फ्रॉम होम संदर्भातील धोरणे अधिक कडक करण्यात आली आहेत. या बदलांचा कर्मचाऱ्यांच्या कामाच्या अनुभवावर परिणाम झाल्याचे सांगितले जात आहे.
कृत्रिम बुद्धिमत्तेच्या वाढत्या प्रभावामुळे आता तरुणांचा करिअरकडे पाहण्याचा दृष्टिकोन बदलत आहे. पूर्वी मोठ्या कंपनीत नोकरी मिळवणे हे अंतिम ध्येय मानले जात होते. मात्र आता अनेक जण AI स्टार्टअपमध्ये काम करणे, स्वतःचा व्यवसाय सुरू करणे किंवा नवीन तंत्रज्ञानात कौशल्य विकसित करून मोठी संधी मिळवण्यावर भर देत आहेत.
विशेषतः Generative AI सारख्या तंत्रज्ञानामुळे नव्या कंपन्यांसाठी मोठ्या संधी निर्माण झाल्या आहेत. त्यामुळे अनुभवी इंजिनीअर आणि संशोधक मोठ्या कंपन्या सोडून नव्या AI क्षेत्राकडे वळताना दिसत आहेत.
जागतिक टेक उद्योगातील हा बदल भारतीय आयटी क्षेत्र आणि विद्यार्थ्यांसाठीही महत्त्वाचा मानला जात आहे. केवळ मोठ्या कंपनीचा ब्रँड किंवा जास्त पगार यापेक्षा नवीन तंत्रज्ञानातील कौशल्य, नावीन्यपूर्ण विचार आणि दीर्घकालीन संधी यांना आता अधिक महत्त्व दिले जात आहे.
त्यामुळे AI च्या युगात करिअर घडवताना सातत्याने नवीन कौशल्ये आत्मसात करणे आणि बदलत्या तंत्रज्ञानाशी जुळवून घेणे हेच यशस्वी होण्याचे सर्वात मोठे सूत्र असणार आहे.
