Gold Silver Rate Today: पश्चिम आशियातील वाढता तणाव, अमेरिकेतील बाँड यील्डमध्ये झालेली वाढ आणि व्याजदर पुन्हा वाढण्याची शक्यता यामुळे सोन्याचे भाव घसरले आहेत. एक दिवस स्थिर राहिल्यानंतर सोन्याच्या किमतीत आज, 30 सप्टेंबर रोजी पुन्हा घसरण झाली आहे. सलग तीन दिवसांच्या हालचालीत 24 कॅरेट सोन्याचा दर 10 ग्रॅममागे ₹3,890, तर 22 कॅरेट सोन्याचा दर ₹3,560 ने कमी झाला आहे.
आजच्या व्यवहारात 24 कॅरेट सोन्याचा 10 ग्रॅमचा दर ₹10 ने, तर 22 कॅरेट सोन्याचा दरही ₹10 ने घसरला आहे. त्यामुळे सोन्याच्या दरात गेल्या काही दिवसांपासून सुरू असलेली घसरण कायम असल्याचे दिसत आहे.
मनीकंट्रोलने दिलेल्या माहितीनुसार 30 सप्टेंबर रोजी दिल्लीमध्ये 24 कॅरेट सोन्याचा 10 ग्रॅमचा भाव ₹1,48,940 आहे. 22 कॅरेट सोन्याचा भाव ₹1,36,540, तर 18 कॅरेट सोन्याचा भाव ₹1,11,740 आहे.
मुंबईत 24 कॅरेट सोन्याचा 10 ग्रॅमचा भाव ₹1,48,790 आहे. 22 कॅरेट सोन्याचा भाव ₹1,36,390, तर 18 कॅरेट सोन्याचा भाव ₹1,11,590 आहे.
सोन्याबरोबरच चांदीच्या दरातही आज घसरण झाली आहे. एक दिवस स्थिर राहिल्यानंतर 30 सप्टेंबर रोजी चांदीचा भाव किलोमागे ₹100 ने कमी झाला आहे.
दिल्लीमध्ये एक किलो चांदी आता ₹2,39,900 दराने विकली जात आहे. मुंबई, कोलकाता आणि चेन्नईमध्येही चांदीचा दर जवळपास याच पातळीवर आहे.
याआधी 28 सप्टेंबर रोजी चांदीच्या दरात किलोमागे ₹5,000 ची मोठी घसरण झाली होती. त्यानंतर एक दिवस दर स्थिर राहिले. आता सप्टेंबर महिन्याच्या शेवटच्या दिवशी पुन्हा चांदी स्वस्त झाली आहे.
देशातील प्रमुख शहरांमध्ये चांदीचा दर साधारण ₹2,39,900 ते ₹2,45,000 प्रति किलोच्या आसपास आहे. स्थानिक बाजारपेठ, कर आणि इतर शुल्कांमुळे शहरानुसार दरात थोडाफार फरक असू शकतो.
तज्ज्ञांच्या मते, पश्चिम आशियातील तणाव आणि अमेरिका-इराणमधील संघर्षाची परिस्थिती अजूनही चिंतेची आहे. या तणावामुळे कच्च्या तेलाच्या किमती उच्च पातळीवर राहण्याची शक्यता आहे. तेल महागल्यास महागाई वाढण्याचा धोका असतो.
अमेरिकेतील महागाईवर नियंत्रण ठेवण्यासाठी फेडरल रिझर्व्हकडून व्याजदर वाढवले जाण्याची शक्यता व्यक्त केली जात आहे. व्याजदर वाढल्यास सोन्यासारख्या मालमत्तेवरील गुंतवणुकीचा आकर्षण काही प्रमाणात कमी होऊ शकते. त्यामुळे सोन्याच्या किमतीवर दबाव येतो.
याशिवाय अमेरिकन डॉलर मजबूत झाल्यासही सोन्याच्या दरावर परिणाम होतो. त्यामुळे सध्या भू-राजकीय तणाव, वाढते बाँड यील्ड, व्याजदराची शक्यता आणि मजबूत डॉलर या सर्व घटकांचा सोन्याच्या किमतीवर परिणाम होत आहे.
मात्र, पश्चिम आशियातील तणाव वाढल्यास सुरक्षित गुंतवणूक म्हणून सोन्याची पुन्हा मागणी वाढू शकते. त्यामुळे पुढील काळात सोन्याच्या दरात चढ-उतार कायम राहण्याची शक्यता आहे.
