Employee Millionaire Bonus: व्यवसायात नफा कमावणे ही प्रत्येक कंपनीची प्राथमिकता असते. मात्र, एखाद्या कंपनीचा मालक आपल्या यशात कर्मचाऱ्यांनाही समान वाटेकरी बनवतो, अशी उदाहरणे फारच कमी पाहायला मिळतात. अमेरिकेत घडलेली अशीच एक प्रेरणादायी घटना सध्या जगभर चर्चेत आहे. एका कंपनीच्या विक्रीतून मिळालेल्या हजारो कोटी रुपयांपैकी मोठा हिस्सा मालकाने थेट आपल्या कर्मचाऱ्यांमध्ये वाटला आणि तब्बल 540 कर्मचारी रातोरात करोडपती झाले.
अमेरिकेतील लुईझियाना राज्यातील ‘फायबरबॉन्ड’ (Fibrebond) ही कंपनी नुकतीच ईटन (Eaton) या मोठ्या उद्योगसमूहाने सुमारे 1.7 अब्ज डॉलर म्हणजेच जवळपास 14 हजार कोटी रुपयांना विकत घेतली. या व्यवहारातून कंपनीच्या मालक असलेल्या वॉकर कुटुंबाला मोठी रक्कम मिळाली. मात्र त्यांनी केवळ स्वतःचा फायदा न पाहता कंपनीच्या यशात योगदान देणाऱ्या कर्मचाऱ्यांनाही या आनंदात सहभागी करून घेतले.
व्यवहार पूर्ण झाल्यानंतर वॉकर कुटुंबाने सुमारे 240 दशलक्ष डॉलर म्हणजेच जवळपास 2 हजार कोटी रुपये कर्मचाऱ्यांसाठी राखून ठेवले. कंपनीतील 540 पूर्णवेळ कर्मचाऱ्यांना ही रक्कम वाटण्यात आली. सरासरी प्रत्येक कर्मचाऱ्याच्या वाट्याला सुमारे 3.7 कोटी रुपये आले.
विशेष म्हणजे कंपनीचे माजी मुख्य कार्यकारी अधिकारी (CEO) ग्राहम वॉकर यांनी व्यवहारावर स्वाक्षरी करण्यापूर्वीच एक महत्त्वाची अट घातली होती. कंपनी विक्रीतून मिळणाऱ्या एकूण रकमेपैकी 15 टक्के हिस्सा कर्मचाऱ्यांना देण्यात यावा, अशी त्यांची स्पष्ट भूमिका होती. कंपनीत कर्मचाऱ्यांचे शेअर्स नसतानाही त्यांनी हा निर्णय घेतला. यामागचे कारण विचारले असता त्यांनी साधे उत्तर दिले “कारण 15 टक्के हे 10 टक्क्यांपेक्षा जास्त आहे.”
ही बोनस रक्कम कर्मचाऱ्यांना टप्प्याटप्प्याने मिळणार आहे. गेल्या वर्षीपासून त्याची सुरुवात झाली असून पुढील पाच वर्षांपर्यंत ही रक्कम हप्त्यांमध्ये दिली जाणार आहे. मात्र यासाठी कर्मचाऱ्यांनी कंपनीत कार्यरत राहणे आवश्यक आहे. 65 वर्षांपेक्षा जास्त वयाच्या कर्मचाऱ्यांना मात्र ही अट लागू नाही. ते इच्छित असल्यास संपूर्ण रक्कम घेऊन निवृत्त होऊ शकतात.
ही कंपनी 1982 मध्ये क्लॉड वॉकर यांनी सुरू केली होती. सुरुवातीला रेल्वे मार्गांजवळील वीज आणि दूरसंचार उपकरणांसाठी संरक्षक शेड्स तयार करण्याचा व्यवसाय होता. मात्र कंपनीच्या प्रवासात अनेक संकटे आली. 1998 मध्ये भीषण आगीत कारखाना जळून गेला. त्यानंतर आर्थिक मंदीमुळे कर्मचाऱ्यांची संख्या 900 वरून 320 पर्यंत घसरली. तरीही वॉकर कुटुंबाने कर्मचाऱ्यांना साथ सोडली नाही.
कंपनीचे नशीब बदलले ते डेटा सेंटर इन्फ्रास्ट्रक्चर क्षेत्रातील मोठ्या गुंतवणुकीमुळे. क्लाउड कॉम्प्युटिंग, कृत्रिम बुद्धिमत्ता (AI) आणि ऊर्जा क्षेत्रातील वाढत्या मागणीमुळे कंपनीकडे मोठ्या प्रमाणात ऑर्डर्स येऊ लागल्या. अवघ्या पाच वर्षांत कंपनीची विक्री तब्बल 400 टक्क्यांनी वाढली आणि अनेक मोठ्या कंपन्यांचे लक्ष तिच्याकडे वेधले गेले.
या बोनसचा कर्मचाऱ्यांच्या आयुष्यावर मोठा परिणाम झाला आहे. काहींनी घरावरील कर्ज फेडले, काहींनी स्वतःचा व्यवसाय सुरू केला, तर काहींनी निवृत्तीनंतरचे स्वप्न पूर्ण केले. अनेकांसाठी ही रक्कम आयुष्य बदलणारी ठरली आहे.
ग्राहम वॉकर यांनाही या व्यवहारातून अब्जावधी रुपयांचा फायदा झाला. मात्र त्यांनी जगाला एक महत्त्वाचा मेसेज दिला, खरे यश तेच, ज्यामध्ये तुमच्यासोबत काम करणारे लोकही तुमच्यासोबत प्रगती करतात. म्हणूनच ही कथा केवळ एका व्यावसायिक व्यवहाराची नसून, कर्मचाऱ्यांप्रती कृतज्ञता आणि विश्वासाची प्रेरणादायी कहाणी ठरत आहे.
