Hair Growth sambrani dhoop benefits
केस गळणे, विरळ होणे आणि केसांची वाढ खुंटणे या समस्यांनी अनेकजण त्रस्त असतात. सुंदर आणि मजबूत केस केवळ सौंदर्य वाढवतातच शिवाय ते तुमच्या उत्तम आरोग्याचे लक्षणही मानले जातात. केसांच्या आरोग्यासाठी योग्य निगा राखणे अत्यंत आवश्यक आहे. केसांच्या मजबुतीसाठी आयुर्वेदातील एक प्राचीन उपाय सध्या चर्चेत आहे, तो म्हणजे 'सांब्राणी धूप' ची धुरी.
पूर्वी केसांच्या आरोग्यासाठी धुरी घेण्याची परंपरा अत्यंत महत्त्वाची मानली जात असे. 'जोधा अकबर' यांसारख्या चित्रपटांतूनही याचे चित्रण पाहायला मिळाले आहे. आधुनिक काळात ही पद्धत मागे पडली असली, तरी केसांच्या मुळांना पोषण देण्यासाठी ही एक प्रभावी आयुर्वेदिक उपचार पद्धती आहे.
आयुर्वेद आणि नैसर्गिक उपचार तज्ज्ञ ऋत्विका यांच्या मते, सांब्राणी धूप ही 'स्टायरॅक्स' वृक्षापासून मिळणारी एक नैसर्गिक औषधी वनस्पती आहे. याचा सुगंध काष्ठयुक्त आणि कस्तुरीसारखा असतो. हा धूप केवळ केसांसाठीच नाही, तर मनःशांतीसाठीही फायदेशीर ठरतो. यामुळे शरीरातील ऊर्जेचे संतुलन राखले जाते आणि मनावरचा ताण हलका होतो.
सांब्राणीचा धूर शरीरातील 'वात दोष' नियंत्रित करण्यास मदत करतो. या हर्बल धुरात कडुलिंब, तुळस आणि गुग्गुळ यांचे मिश्रण केल्यास त्यात अँटी-बॅक्टेरिअल आणि अँटी-फंगल गुणधर्म येतात. यामुळे टाळूवरील घाण, बॅक्टेरिया आणि घाम निघून जाण्यास मदत होते. या धुरीमुळे डोक्याच्या भागातील रक्ताभिसरण सुधारते, ज्यामुळे केसांच्या मुळांना योग्य पोषण मिळून केस मजबूत होतात. प्राचीन मान्यतेनुसार, सांबराणीच्या धुपाने परिसरातील नकारात्मक ऊर्जा नष्ट होते.
केसांसाठी ही पद्धत फायदेशीर असली, तरी ऋत्विका यांच्या मते याचा वापर दररोज करू नये. त्या स्वतः महिन्यातून केवळ एक किंवा दोनदाच या पद्धतीचा अवलंब करतात. गुग्गुळ किंवा कापूर यांसारख्या नैसर्गिक पदार्थांचा अतिप्रमाणात घेतलेला धूर फुफ्फुसांसाठी अपायकारक ठरू शकतो. त्यामुळे हे उपचार मर्यादित स्वरूपातच करावेत.
'अनाहता ऑरगॅनिक' या वेलनेस ब्रँडने सांब्राणी धुरी घेण्याची योग्य पद्धत सांगितली आहे. यासाठी नैसर्गिक सांबराणी किंवा लोबान कप घेऊन तो धुपपात्रात पेटवावा. हे काम गॅलरीसारख्या हवेशीर ठिकाणी करावे, जेणेकरून धूर साचून राहणार नाही. आंघोळीनंतर ओल्या केसांवर ही धुरी घ्यावी. धुपपात्र आणि केस यामध्ये किमान १५ ते २५ सेंटीमीटर अंतर राखणे गरजेचे आहे. धुरी घेऊन झाल्यानंतर जाड दातांच्या फणीने केस विंचरावेत, जेणेकरून धुपातील नैसर्गिक तेल केसांत सर्वत्र पसरतील.
