वातावरणातील बदलांमुळे ताप येणे ही एक सामान्य समस्या आहे. परंतु, सुरुवातीच्या काळात डेंग्यू आणि सामान्य व्हायरल तापाची लक्षणे अगदी सारखी दिसतात. यामुळे या दोघांमधील फरक ओळखणे कठीण होते.
डेंग्यू आणि सामान्य ताप हे दोन्ही विषाणूजन्य संसर्ग असले तरी त्यांच्या पसरण्याच्या पद्धतीत मोठा फरक आहे. डेंग्यू हा बाधित एडीज डासाच्या चावण्याने पसरतो. याउलट, व्हायरल ताप हा इन्फ्लुएंजा किंवा इतर विषाणूंमुळे होतो, जो बाधित व्यक्तीच्या शिंकण्याने किंवा खोकण्याने हवेद्वारे पसरू शकतो. डेंग्यूमध्ये अचानक १०२ ते १०४ अंश फॅरेनहाईटपर्यंत तीव्र ताप येतो आणि तो अनेक दिवस टिकून राहतो. सामान्य व्हायरल तापामध्ये ताप मध्यम स्वरूपाचा असतो आणि विश्रांती अथवा साध्या औषधांनी काही दिवसांत कमी होतो.
डेंग्यूमध्ये स्नायू आणि हाडांमध्ये अत्यंत तीव्र वेदना होतात. म्हणूनच याला ‘ब्रेकबोन फीवर’ (हाडे मोडणारा ताप) असेही म्हणतात. व्हायरल तापामध्ये शरीर दुखते, परंतु वेदना डेंग्यूइतक्या तीव्र नसतात.
डोळ्यांच्या मागच्या भागात तीव्र वेदना होणे आणि डोळ्यांची हालचाल करताना त्रास होणे हे डेंग्यूचे मुख्य लक्षण मानले जाते.
डेंग्यूचा संसर्ग झाल्यानंतर काही दिवसांनी त्वचेवर, विशेषतः छाती, मान आणि चेहर्‍यावर लाल रंगाचे चट्टे किंवा पुरळ दिसू शकतात.
डेंग्यूच्या संसर्गादरम्यान आजाराच्या तिसर्‍या ते सातव्या दिवसाच्या दरम्यान रक्तातील प्लेटलेटस्‌ची संख्या वेगाने कमी होऊ शकते. सामान्य व्हायरल तापामध्ये प्लेटलेटस् सहसा सामान्य राहतात.
गंभीर डेंग्यूच्या स्थितीत हिरड्यांतून किंवा नाकातून रक्त येणे, अथवा लघवी वा मलामधून रक्त पडणे अशी गंभीर लक्षणे दिसू शकतात.
डेंग्यूची खात्री करण्यासाठी पहिल्या ५ दिवसांत एनएस१ अँटिजन चाचणी, तसेच सीबीसी आणि डेंग्यू आयजीएम/आयजीजी चाचण्या केल्या जातात.
जर तीव्र तापासोबत उलट्या होणे, श्वास घेण्यास त्रास होणे किंवा शरीरावर रक्ताचे डाग दिसणे अशी लक्षणे आढळल्यास ताबडतोब वैद्यकीय उपचार घेणे आवश्यक आहे.
