Heart Disease | हृदयरोगींनी प्रवासादरम्यान काय घ्यावी काळजी?

By:Anuradha Koravi Published on: February 22, 2024, 4:20 PM

डॉ बिपीनचंद्र भामरे

हृदयविकारात, विविध प्रकार अनेकांना त्रासदायक ठरतात. असाच एक प्रकार म्हणजे कोरोनरी आर्टरी डिसीज -जो हृदयाला रक्त आणि ऑक्सिजन पुरवठा करणार्‍या धमन्या अरुंद होतात किंवा प्लाक तयार झाल्यामुळे ब्लॉक होतात तेव्हा होतो. यामुळे हृदयविकाराचा झटका, हार्ट फेल्युअर देखील होऊ शकते. दुसरा महत्त्वाचा प्रकार म्हणजे अरिथमिया, अनियमित हृदयाचा ठोका म्हणजे जेव्हा तुमचे हृदय खूप वेगवान, खूप मंद किंवा अनियमितपणे धडधडते, ज्याला अरिथमिया म्हणतात. (Heart Disease)

संबंधित बातम्या

अरिथमियामुळे छातीत धडधडणे, चक्कर येणे, शरीर सुन्न पडणे किंवा अचानक हृदयविकाराचा झटका येऊ शकतो. कार्डिओमायोपॅथी हा हृदयाच्या स्नायूंवर परिणाम करणार्‍या रोगांचा समूह आहे आणि त्यामुळे हृदयाची पंपिंगची कार्यक्षमता कमी होते. डायलेटेड कार्डिओमायोपॅथीमुळे हृदयाच्या चेंबर्स वाढतात आणि कमकुवत होतात, तर हायपरट्रॉफिक कार्डिओमायोपॅथीमध्ये स्नायूंच्या ऊतींचे असामान्य वाढ होणे समाविष्ट असते. हृदयविकार असलेल्यांनी प्रवास करताना काही विशेष सावधगिरी बाळगणे आवश्यक आहे.

हृदयविकार असलेल्या व्यक्तींना प्रवासात अनेक आव्हानांचा सामना करावा लागतो. प्रवासाचा ताण, हवेत बदल आणि दीर्घकाळ एकाच जागी बसून राहणे या सर्वांमुळे हृदयविकार असलेल्यांना अनेक अडचणींचा सामना करावा लागू शकतो. प्रवास करताना संतुलित आहाराचे सेवन न केल्यानेही आरोग्यावर दुष्परिणाम होतो. या व्यक्तींनी कोणत्याही प्रवासाला जाण्यापूर्वी काळजीपूर्वक नियोजन करणे आवश्यक आहे.

प्रवास करताना या गोष्टी विसरू नका

हृदयविकार असलेल्या लोकांनी सुरक्षित आणि आनंददायी प्रवास करण्यासाठी काही सावधगिरी बाळगणे महत्त्वाचे आहे. प्रवासादरम्यान अनपेक्षित विलंब किंवा आणीबाणीच्या बाबतीत आवश्यक औषधे सोबत बाळगणे गरजेचे आहे.

हृदयविकारासह प्रवास करताना निरोगी जीवनशैली बरोबरच पोषक आहाराची आवश्यकता आहे. प्रवास करताना तुमचा रक्तदाब नियंत्रणात ठेवण्यासाठी सुकामेवा आणि तेलबिया, ताजी फळे आणि भाज्या यांसारख्या कमी सोडियमयुक्त पदार्थांची निवड करावी. प्रवासात हेल्दी स्नॅक्स सोबत ठेवावे. जेणेकरून जंक फूड, तेलकट पदार्थांपासून दूर राहता येते.

प्रवास करताना हृदयविकार असलेल्या लोकांसाठी हायड्रेटेड राहणे महत्त्वाचे आहे. पाण्याची बाटली सोबत ठेवा आणि साखरयुक्त पेये किंवा कॅफीनयुक्त पेय टाळा, कारण ते निर्जलीकरणास कारणीभूत ठरू शकतात आणि हृदयाच्या समस्या वाढवू शकतात. प्रवासादरम्यान बाहेर जेवताना सॅलडसारखे पर्याय निवडणे योग्य राहील. जेवणाच्या वेळेचे योग्य नियोजन करून आणि योग्य निवड करावी.

दीर्घकाळापर्यंत बसून न राहता हलकी शारीरिक हालचाल केल्याने रक्ताभिसरण सुरळीत राखण्यास आणि रक्ताच्या गुठळ्या होण्याचा धोका कमी होण्यास मदत होते. सोबत सदैव औषधांची प्रत तसेच डॉक्टरांचे पत्र जवळ ठेवा. हे उपाय गांभीर्याने घेतल्यास हृदयविकार असलेल्या व्यक्ती आत्मविश्वासाने प्रवास करू शकतात. (Heart Disease)