शेतकऱ्याचा नादच खुळा ! चक्क थारने नांगरली शेती

वरकुटे बुद्रुक(पुणे); पुढारी वृत्तसेवा : बैल जोडी किंवा ट्रॅक्टरच्या साह्याने शेतीची नांगरट केली जाते. मात्र, इंदापूर तालुक्यातील लोणी देवकर येथील एका शेतकऱ्याने चक्क थार गाडीने आपली शेती नांगरली. त्याचा व्हिडिओ चांगलाच व्हायरल होत आहे. थार या गाडीचे सध्या मोठे आकर्षण आहे. ही गाडी खरेदी करण्यासाठी तब्बल एक वर्षाहून अधिक काळ प्रतीक्षा करावी लागते. तेव्हा कुठे ही गाडी खरेदीदाराला मिळते. यावरूनच त्या गाडीची सध्या लोकप्रियता लक्षात येते.

लोणी देवकर येथील शेतकरी अनिल मधुकर तोंडे या शेतकऱ्याने नांगरटीसाठी या गाडीचा उपयोग केल्याने तो चर्चेचा विषय झाला आहे. तोंडे यांनी एक दोन सऱ्या नव्हे, तर जवळपास एक एकर क्षेत्र थार गाडीच्या साह्याने नांगरले. दणकट गाडीच्या साह्याने आपण शेती नांगरट करून पाहूया असा विचार मनात आल्याने त्यांनी जवळपास एक एकर क्षेत्राची नांगरट केली. गाडीच्या साह्याने शेतीची मशागत केल्याचा व्हिडिओ सध्या चांगलाच व्हायरल झाला आहे.