पुढारी ऑनलाईन डेस्क : शेतकरी आंदोलन उग्र होण्याच्या शक्यतेमुळे दिल्लीच्या सीमांवर बंदोबस्त वाढविण्यात आला आहे. तसेच खबरदारीचा उपाय म्हणून हरियाणा राज्यातील अंबाला, कुरुक्षेत्र, कैथल, जिंद, हिस्सार, फतेहाबाद आणि सिरसा या जिल्ह्यांच्या कार्यक्षेत्रातील व्हॉईस कॉल वगळता मोबाइल नेटवर्कवर पुरवल्या जाणाऱ्या मोबाइल इंटरनेट सेवा, बल्क एसएमएस आणि सर्व डोंगल सेवा 15 फेब्रुवारीपर्यंत स्थगित केली आहे. ( Farmers Protest Delhi )
पिकांसाठी किमान आधारभूत किंमत (MSP) हमी देण्यासाठी कायदा लागू करण्यासह विविध मागण्या पूर्ण करण्यासाठी हरियाणातील संयुक्त शेतकरी मोर्चा, शेतकरी कामगार मोर्चासह २०० हून अधिक शेतकरी संघटनांनी मंगळवार (दि.१३) रोजी 'चलो दिल्ली'ची हाक दिली. हरियाणा प्रशासनाने जारी केलेल्या अधिसूचनेनुसार, अंबाला, कुरुक्षेत्र, कैथल, जिंद, हिसार, फतेहाबाद आणि सिरसा जिल्ह्यांच्या कार्यक्षेत्रात व्हॉईस कॉल वगळता, मोठ्या प्रमाणात एसएमएस आणि मोबाइल नेटवर्कवर प्रदान केलेल्या सर्व डोंगल सेवा निलंबित राहतील. दरम्यान, आज (दि.१४) दिल्ली-गाझियाबाद सीमेवर शेतकऱ्यांचा निषेध आणि अधिकाऱ्यांनी केलेल्या सुरक्षा तपासणीमुळे लांब वाहतूक कोंडी दिसून आली. शेतकऱ्यांच्या निषेधाच्या पार्श्वभूमीवर दिल्लीतील सिंघू सीमेवर जलद कृती दलाचे जवान, पोलिस कर्मचारी आणि दंगल नियंत्रण वाहने तैनात करण्यात आले आहेत.
