आपण दिवसभर कामात इतके व्यग्र असतो की, संध्याकाळी घरी आल्यावर पायावर उभे राहून काही करायची क्षमता राहत नाही. दिवसभर उभे राहून करावयाचेे काम असेल तेव्हा संध्याकाळी पाय दुखतात, सुजतात. अशा वेळी पायांना आरामाची अतोनात गरज असते. या दुखण्यावर, सुजेवर काही नैसर्गिक उपचार करता येतात.
आपल्या पायाला सूज येत असेल, तर त्या ठिकाणी बोटाने दाब द्या. दाब दिल्यावर खड्डा किंवा खळीसारखे तयार होईल. बोट काढल्यावर काही सेकंदभर हा खड्डा तसाच राहत असेल, तर पायाला आलेली ही सूज काही आजारांचे पूर्वलक्षण असू शकते.
हृदय, यकृत किंवा मूत्रपिंडाशी निगडीत काही आजारांमध्ये अशा प्रकाराची सूज पायाला आलेली असू शकते. त्यामुळे अशा प्रकारे पायावरील सुजेवर बोटाने दाबल्यावर खड्डा पडत असेल, तर पहिल्यांदा वैद्यकीय सल्ला घ्यावा.
कोणत्याही एकाच पायावर सतत सूज येत असेल तरीही वैद्यकीय सल्ला घेण्याची गरज आहे. कारण, काही वेळा पायातील नसेमध्ये रक्ताची गाठ झाल्याने रक्तपुरवठ्यात अडथळा आलेला असतो. त्यामुळेच पायावरही सूज आलेली असते.
पायावर येणारी सूज तसेच श्वसनास त्रास, छातीत दुखणे, ताप, त्वचा काळवंडणे अशी काही लक्षणे दिसल्यास त्वरित वैद्यकीय तपासण्या करून घ्यावात. अर्थात, वरीलपैकी सर्व गोष्टीं नकारात्मक असतील, तर कामाच्या स्वरूपामुळे सुजणार्या पायांवर आपण नैसर्गिक उपायाने आराम मिळवू शकतो.
मीठाच्या पाण्यात पाय बुडवून ठेवा.
पायाला मसाज करा.
धूम्रपान करू नका.
पुरेसे पाणी प्या.
पोषक आहार घ्या, अतिमीठ खाऊ नका.
झोपताना पाय पसरून झोपा. पाय जमिनीपासून वर ठेवण्यासाठी पायाखाली उशा घ्या.
खूप अधिक वेळ एकाच स्थितीत बसायचे टाळा.
प्रवास करताना कॉम्प्रेशन सॉक्स टाळा.
पुरेसे मॅग्नेशियम सप्लिमेंटस् घ्या.
डॉक्टरी सल्ला आणि काही नैसर्गिक उपाय केल्यास पायाची सूज कमी होण्यास नक्कीच मदत होईल.
डॉ. संतोष काळे
