पुणे : पुण्यातील प्रसिद्ध देवस्थान असलेल्या श्रीमंत दगडूशेठ हलवाई गणपतीला मंदिराच्या कळसापासून ते गाभाऱ्यापर्यंत तब्बल 21 हजार सूर्यफुलांची आरास करण्यात आली आहे. चैत्र महिन्यात वसंतऋतूच्या स्वागतासाठी दगडूशेठ गणपतीला सूर्यफुलांचा अभिषेक करण्यात आला. अनेक भाविक ही आरास पाहण्यासाठी गर्दी करताना दिसत आहेत. श्रीमंत दगडूशेठ हलवाई सार्वजनिक गणपती ट्रस्टतर्फे आणि सकाटा सीड इंडिया कंपनीच्या वतीने पहिल्यांदाच दगडूशेठ हलवाई गणपती मंदिरात 21 हजार सूर्यफुलांची आरास करण्यात आली.
सजावटीमध्ये लावण्यात आलेल्या सूर्यफुलांमध्ये तेलबिया येत नसून या फुलांचा वापर केवळ सजावटीसाठी केला जातो. फुलांच्या पाकळ्यांचा रंग गडद भगवा असून मध्यभाग काळा आहे. ही फुले दिसायला खूप आकर्षक असून शेतातून काढल्यानंतर ७-८ दिवस पाण्यामध्ये व्यवस्थित राहतात.
दरवर्षी सणाला किंवा विशेष दिवशी दगडूशेठ गणपती मंदिराला कधी आंब्याची आरास तर कधी मोगऱ्याच्या फुलाने संपूर्ण मंदिराला शुभ्र सजावट करण्यात येते. तर कधी द्राक्षांची आरास करण्यात येते. हे दृश्य पाहण्यासाठी नागरिक मोठी गर्दी करत असतात.
