बर्मिंगहॅम (वृत्तसंस्था) : भारताची महिला ज्युदो खेळाडू तुलिना मानने राष्ट्रकुलमध्ये (CWG 2022) 78 किलो गटात रौप्यपदक पटकावले. अंतिम सामन्यात तुलिका स्कॉटलंडच्या वर्ल्ड नंबर वन असलेल्या सारा एडिलिंग्टनकडून पराभव पत्करावा लागल्याने तिला रौप्यपदकावर समाधान मानावे लागले.
तत्पूर्वी, अत्यंत चुरशीच्या सेमीफायनलमध्ये तुलिकाने ऑस्ट्रेलियाच्या अनुभवी सिडनी अँड्र्यूज हिचा 10-1 अशा एकतर्फी धुव्वा उडविला होता. पण हा फॉर्म तिला अंतिम फेरीत कायम राखता आला नाही. तरीही तिने रौप्यपदकाला गवसणी घातली. (CWG 2022)
22 व्या राष्ट्रकुल क्रीडा स्पर्धेच्या (CWG 2022) सहाव्या दिवशी भारताने 2 रौप्य व 2 कास्य अशी एकूण 4 पदके पटकावली. बॅडमिंटनमधील मिश्र सांघिक प्रकारात भारताने रौप्यपदक पटकावले. तसेच महिला ज्युडो खेळाडू तुलिका मानने रौप्यपदक जिंकले. वेटलिफ्टर लवप्रीत सिंगने 109 किलो वजनी गटात कांस्यपदक पटकावले. तसेच स्क्वॅशमध्ये सौरभ घोषालने कास्य पदकाला गवसणी घातली. तर, महिला बॉक्सर नीतू घनघसन व पुरुष बॉक्सर मोहम्मद हुसामुद्दिन यांनीही पदके निश्चित केली. भारतीय महिला व पुरूष हॉकी संघानेही सेमीफायनलध्ये धडक मारून पदकाच्या आशा पल्लवित केल्या. तर महिला बॉक्सिंगमध्ये निखत झरिननेही सेमीफायनलमध्ये धडक मारली.
