पुढारी ऑनलाइन डेस्क : Canada Work Permit : ज्या भारतीयांकडे H1-B व्हिसा आहे किंवा ज्यांनी त्यासाठी अर्ज दिला आहे. त्यांच्यासाठी कॅनडात काम करण्याची सुवर्ण संधी उपलब्ध होत आहे. युनायटेड स्टेट्समधील सुमारे 75 टक्के भारतीयांकडे H1-B व्हिसा आहे. तसेच येत्या वर्षभरात ज्या भारतीयांनी अमेरिकेच्या H1-B व्हिसासाठी अर्ज केला आहे त्यांना देखील या संधीचा लाभ घेता येईल. इंडिया टुडेने याचे वृत्त दिले आहे.
कॅनडाने देशातील टेक टॅलेंटला आकर्षित करण्यासाठी नवीन योजना सुरू केली आहे. कॅनडाने H1-B व्हिसा धारकांसाठी खुली वर्क परमिट देणे सुरू केले आहे. या परवान्यामुळे अमेरिकेतील H1-B व्हिसाधारकांना कॅनडामध्ये येऊन तीन वर्षांसाठी काम करता येईल. ही योजना मंजूर अर्जदारांच्या कुटुंबातील सदस्यांना अभ्यास करण्यास किंवा देशात कामाचे पर्याय शोधण्याची परवानगी देते. नवीन कार्यक्रम एका वर्षासाठी किंवा कॅनेडियन सरकारला 10,000 अर्ज प्राप्त होईपर्यंत लागू असणार आहे. Canada Work Permit
"हाय-टेक क्षेत्रातील हजारो कर्मचारी कॅनडा आणि यूएस या दोन्ही देशांमध्ये मोठ्या प्रमाणावर काम करणाऱ्या कंपन्यांमध्ये काम करतात आणि यूएसमध्ये काम करणाऱ्यांकडे अनेकदा H1-B स्पेशॅलिटी ऑक्युपेशन व्हिसा असतो. 16 जुलै 2023 पर्यंत, H1-B यूएस मधील विशेष व्यवसाय व्हिसा धारक आणि त्यांच्या सोबतचे कुटुंबातील सदस्य कॅनडामध्ये येण्यासाठी अर्ज करण्यास पात्र असतील," असे कॅनडाच्या सरकारने या महिन्याच्या सुरुवातीला एका प्रकाशनात म्हटले आहे.
या माहितीनुसार, "H1-B व्हिसाधारक कोणत्याही कंपनीसाठी कॅनडामध्ये कुठेही काम करण्यास सक्षम असतील. तसेच त्यांचे पती/पत्नी आणि अवलंबित देखील आवश्यकतेनुसार, काम किंवा अभ्यास परवान्यासह तात्पुरत्या निवासी व्हिसासाठी अर्ज करण्यास पात्र असतील," असे त्यात म्हटले आहे.
H1-B व्हिसा परदेशी नागरिकांना तंत्रज्ञान क्षेत्रासह काही विशिष्ट व्यवसायांमध्ये अमेरिकेत तात्पुरते काम करण्याची परवानगी देतात. तंत्रज्ञान कंपन्या भारत आणि चीन सारख्या देशांमधून दरवर्षी हजारो कर्मचारी नियुक्त करण्यासाठी त्यावर अवलंबून असतात.
कॅनडा विविध उदयोन्मुख तंत्रज्ञानामध्ये जागतिक नेता बनण्याची आशा करत आहे आणि यूएस टेक दिग्गजांकडून मोठ्या प्रमाणात टाळेबंदीमुळे प्रभावित व्यावसायिकांना आकर्षित करण्याची आशा आहे.
हे ही वाचा :
