बेळगाव : टँकरच्या धडकेत महिला ठार

बेळगाव; पुढारी वृत्तसेवा : अयोध्यानगर येथे सिग्‍नलजवळ टँकरने दुचाकीला धडक दिल्याने महिला ठार झाल्याची घटना शनिवारी सायंकाळी घडली. रेणुका महेश भातकांडे (वय 33, रा. शिवाजीनगर) असे मृत महिलेचे नाव आहे. घटनेची नोंद उत्तर विभाग रहदारी पोलिस स्थानकात झाली आहे.

सदर महिला दुचाकीवरुन चन्नम्मा सर्कलकडे जात असताना ही अपघात घडला. यात सदर महिला गंभीर जखमी झाली होती. तिला जवळच्या खासगी रुग्णालयात दाखल करण्यात आले होते. मात्र उपचार सुरु असताना तिचा मृत्यू झाला. ती एका खासगी शाळेमध्ये शिक्षिका असल्याचे समजते. या घटनेमुळे काही काळ वाहतूक कोंडी झाली होती. रहदारी पोलिसांनी महिलेला उपचारासाठी पाठवून वाहतूक कोंडी दूर केली.