बेळगाव : ‘कानडी’चा वार, ‘मराठी’ ठरतेय गुन्हेगार
पुढारी वृत्तसेवा; शिवाजी शिंदे : गाव भेंडिगेरी. बेळगाव तालुक्याच्या पूर्व भागातील कन्नड भाषिक गाव. त्या ठिकाणी काही मराठा समाजबांधव आहेत. तेथे एका अल्पवयीन मुलीचा विवाह समाजकल्याण खात्याच्या अधिकार्यांनी रोखला. त्यामुळे संतप्त बनलेल्या काहीजणांनी संगोळ्ळी रायण्णा पुतळ्याची विटंबना केली. त्यानंतर हे कृत्य मराठी भाषिक मराठा समाजातील युवकांनी कृत्य केल्याची तक्रार पोलिस स्थानकात नोंदविण्यात आली. या प्रकरणी मराठी भाषिक युवकांना ताब्यात घेण्यात आले.
गाव कुरबरहट्टी. मराठी आणि कन्नड भाषिकांची या ठिकाणी वस्ती आहे. एका वरातीतील मद्यधुंद युवकांनी धर्मवीर संभाजी महाराजांच्या पुतळ्याच्या दिशेने हुक्के लावले. यामुळे संतप्त झालेल्या मराठी युवकांनी त्या ठिकाणी आक्षेप घेत, पुढे जाण्यास सुनावले. यामुळे कन्नड भाषिकांकडून मराठी युवकांवर मारहाणीचा गुन्हा दाखल करण्यात आला. आठ युवकांना ताब्यात घेऊन कारागृहात दाखल करण्यात आले.
या दोन घटना अलिकडच्या पंधरा दिवसांतील. येनकेनप्रकारे सीमाभागातील मराठी भाषिक युवकांना टार्गेट करून त्यांच्यावर खोटे गुन्हे दाखल करण्याचा प्रकार कन्नड संघटनांनी प्रशासनाच्या सहकार्यातून राजरोसपणे सुरू केला आहे. प्रत्येक वादाला भाषिक वादाचा रंग देऊन सीमाभागात कन्नड धोक्यात असल्याची आवई उठविण्याचा प्रयत्न सुरू आहे. यामध्ये मराठी युवक भरडला जात आहे. त्यांचे आयुष्य अंध:कारमय बनत आहे.
प्रत्येक घटनेमध्ये मराठी युवकांना लक्ष्य करण्याचा प्रयत्न सुरू झाला आहे. यामुळे मराठी भाषिकांमध्ये संताप धुमसत आहे. अधिकार आणि बळाचा वापर करत मराठी चळवळ मोडीत काढण्याचा कुटील डाव खेळण्यात येत आहे. मागील काही वर्षांपासून यामध्ये वाढ झाली आहे.
यापूर्वी सीमाभागातून म. ए. समितीचे लोकप्रतिनिधी निवडून येत असत. त्यामुळे मराठी भाषिकांवरील अत्याचाराला ताबडतोड वाचा फोडण्यात येत असे. परंतु अलिकडे राष्ट्रीय पक्षांच्या नादी लागलेल्या काही मराठी भाषिकांमुळे कन्नड भाषिकांचे फावले आहे. मराठी भाषिकांना रोखण्यासाठी मराठी भाषिकांना लक्ष्य करण्यात
येत आहे.
असे गुन्हे, असे निर्बंध
- मणगुत्ती (ता. हुक्केरी) येथे उभारण्यात आलेल्या छत्रपती शिवाजी महाराजांच्या पुतळ्याला कन्नड भाषिकांनी आक्षेप घेतला. त्यामुळे दीड वर्षापासून शिवाजी महाराजांचा पुतळा एका घरात झाकून ठेवण्यात आला आहे.
- पिरनवाडी येथे छत्रपती शिवाजी महाराज पुतळ्यासमोरच संगोळ्ळी रायण्णा यांचा पुतळा उभारण्यात आला. या प्रकरणी मराठी युवकांवर गुन्हे दाखल.
- अनगोळ येथे खासगी जागेतील संगोळ्ळी रायण्णांच्या पुतळ्याच्या विटंबना प्रकरणी मराठी युवकांना कारणीभूत ठरवून गुन्हे दाखल.
- बंगळूर येथे छत्रपती शिवाजी महाराजांच्या पुतळ्याची विटंबना करण्यात आली. त्याच्या निषेधार्थ आंदोलन करणार्या मराठा समाजातील युवकांवर देशद्रोहाचा गुन्हा दाखल करण्याचा प्रयत्न.
- बेळगाव येथील सह्याद्रीनगर परिसरात छत्रपती शिवाजी महाराजांचा पुतळा उभारण्याचा प्रयत्न हाणून पाडला. मराठी युवकांवर प्रशासनांकडून गुन्हा दाखल.
- हलशी येथे मराठी युवकांना टार्गेट करून गुन्हे दाखल.
- सांबरा, कुद्रेमानी यासह सीमाभागात होणार्या साहित्य संमेलन संयोजकांवर गुन्हे. त्याचबरोबर महाराष्ट्रातील साहित्यिक, लोकप्रतिनिधी यांना आणण्यास निर्बंध.
- म. ए. समितीकडून वेळोवेळी काढण्यात येणारा मोर्चा, सभा, बैठकांच्यावर आक्षेप आणि संयोजकांवर गुन्हे.
- सीमावासीयांचा महामेळावा आयोजित करण्यास आक्षेप. सभा घेण्यावर निर्बंध. संयोजकांवर गुन्हे.
- मध्यवर्ती म. ए. समितीचे अध्यक्ष दीपक दळवी यांना महामेळाव्यादिवशी कन्नड गुंडांकडून काळे फासण्याचा प्रकार.
- येळ्ळूर येथील महाराष्ट्र राज्य फलक हटविला. हजारो युवकांना बेदम मारहाण, शेकडो जणांवर गुन्हे.
- गावागावांतून महाराष्ट्र राज्य फलक उभारणार्या मराठी युवकांवर पोलिसांकडून गुन्हे.
