निपाणी : निपाणी तालुक्यात सोमवारी दिवसभर पावसाचा जोर वाढल्याने बेळगाव जिल्ह्यासह तालुक्याला उद्या रेड अलर्ट जारी केला आहे. विद्यार्थ्यांच्या सुरक्षेचा विचार करून तालुक्यातील प्राथमिक व माध्यमिक (पहिली ते दहावी) पर्यंतच्या शाळांना उद्या मंगळवारी (दि. १९) जिल्हा प्रशासनाच्या सूचनेनुसार सुट्टी जाहीर करण्यात आली आहे, अशी माहिती तहसीलदार एम.एन.बळीगार यांनी दिली.
गेल्या दोन दिवसांपासून निपाणी परिसरात पावसाचा जोर आहे. मात्र, सोमवारी दिवसभर मुसळधार पाऊस पडल्याने हवामान खात्याने जिल्ह्यासह तालुक्याला रेड अलर्ट जाहीर केला. यामुळे जिल्हाधिकारी मोहम्मद रोशन यांच्या सूचनेनुसार तालुक्यातील प्राथमिक व माध्यमिक शाळांना सुरक्षेच्या दृष्टीने उद्या मंगळवारी सुट्टी देण्यात आली आहे. यामध्ये महाविद्यालयाचे सर्व कामकाज मात्र नियमित सुरू राहणार आहे. मंगळवारी पाऊस परिस्थितीचा अंदाज घेऊन बुधवारी प्राथमिक, माध्यमिक, शाळांसह महाविद्यालयांनाही सुट्टी देण्याचा विचार केला जाणार असल्याचेही बळीगार यांनी दै.पुढारीशी बोलताना सांगितले.
