बेळगाव : विजेच्या धक्का लागून शालेय विद्यार्थिनीचा दुर्दैवी मृत्यू झाल्याची हृदयद्रावक घटना शुक्रवारी (दि. 2) सकाळी सांबरा (ता. बेळगाव) येथे घडली. परिणिती चंद्रू पालकर (वय 13, रा. महात्मा फुले गल्ली, सांबरा) असे तिचे नाव आहे. ती गावातील सरकारी मराठी प्राथमिक शाळेत सातवीत शिकत होती.
याबाबत मिळालेली अधिक माहिती अशी ः परिणिती शुक्रवारी सकाळी साडेआठच्या सुमारास घरातील पाण्याची मोटर सुरू करत होती. त्यावेळी तिला अचानक विजेचा जोरदार धक्का बसला. धक्का इतका तीव्र होता की, ती जागीच कोसळली. घटनेची माहिती मिळताच गल्लीतील युवकांनी तिला तातडीने खासगी रुग्णालयात दाखल केले; मात्र डॉक्टरांनी तपासणीनंतर तिला मृत घोषित केले. परिणिती अभ्यासू, शिस्तप्रिय व गुणी विद्यार्थिनी म्हणून शाळेत परिचित होती. अभ्यासासोबतच शाळेतील विविध उपक्रमांमध्ये तिचा सक्रिय सहभाग असायचा. तिच्या पश्चात आजी, आई, वडील, भाऊ आहे. तिचे वडील चंद्रू गोविंद पालकर यांनी मारीहाळ पोलिस ठाण्यात हेस्कॉमच्या विरोधातफिर्याद दाखल केली आहे. पुढील तपास मारीहाळ पोलिस करत आहेत. या घटनेमुळे संपूर्ण गावात शोककळा पसरली असून हळहळ व्यक्त होत आहे.
