अंकली : विजापूर जिल्यातील निडगुंदी तालुक्यातील गोलसंगी गावात कॅनरा बँकेचे एटीएम गॅस कटरच्या साहाय्याने फोडून अज्ञात चोरट्यांनी तब्बल १९ लाख २९ हजार रुपयांची रोकड लंपास केली. सोमवार-मंगळवारच्या मध्यरात्री सुमारे २.२० वाजण्याच्या सुमारास ही घटना घडली.
चोरट्यांनी गॅस कटरच्या साहाय्याने एटीएम मशीन कापून त्यातील रोकड काढून घेतली आणि तेथून पसार झाले. घटनेची माहिती मिळताच विजयपूरचे पोलिस अधीक्षक लक्ष्मण निंबरगी, बसवनबागेवाडीचे डीवायएसपी चंद्रकांत नंदरेड्डी, निडगुंदीचे सीपीआय शरणगौडा गौडर, पीएसआय यतीश के. एन., कूडगीचे पीएसआय मल्लिकार्जुन तळवार, क्राईम विभागाचे पीएसआय व्ही. एच. हत्तळी, कोल्लारचे पीएसआय अशोक नायक तसेच कॅनरा बँकेचे प्रादेशिक अधिकारी घटनास्थळी दाखल झाले.
अधिकाऱ्यांनी घटनास्थळाची पाहणी करून बँक व्यवस्थापक शरणप्पा एस. होनवाड व कर्मचाऱ्यांकडून घटनेची माहिती घेतली. एटीएम परिसर तसेच आजूबाजूच्या भागातील हालचालींचीही पाहणी करण्यात आली. दरम्यान, गेल्या दोन-तीन दिवसांपासून बँकेसमोरील रस्त्यावर क्रमांक नसलेली एक संशयित कार वारंवार फिरत असल्याचे स्थानिकांनी सांगितले. या कारमधून आलेल्या व्यक्तींनीच चोरी केली असावी, असा संशय व्यक्त केला जात आहे. मात्र, तपास पूर्ण झाल्यानंतरच याबाबत स्पष्टता होणार आहे.
या प्रकरणी कूडगी पोलिस ठाण्यात गुन्हा दाखल करण्यात आला असून, चोरट्यांचा शोध घेण्यासाठी पोलिसांनी तपासाची चक्रे गतिमान केली आहेत. विशेष म्हणजे, गेल्या वर्षी मनगुळी येथील कॅनरा बँक तसेच चडचण येथील एसबीआय बँकेतही मोठ्या चोरीच्या घटना घडल्या होत्या. त्यामुळे एटीएम चोरीच्या या घटनेमुळे परिसरात खळबळ उडाली आहे.
