बेळगाव ः मध्यवर्ती महाराष्ट्र एकीकरण समितीने मराठी फलकांसाठी मोर्चा काढण्याचा इशारा देताच कन्नड संघटनांची वळवळ सुरू झाली आहे. शहरात आता 90 टक्के कानडीकरण झाले असून उर्वरित दहा टक्केही फलकांचे कानडीकरण करण्यात यावे, असा दबाव कन्नड संघटनांनी आयुक्तांवर घातला.
महापालिकेत शुक्रवारी (दि. 9) कन्नड संघटनांच्या कार्यकर्त्यांनी आयुक्त कार्तिक एम. यांचा सत्कार केला. यावेळी त्यांनी आम्ही बेळगावचे कानडीकरण करण्यासाठी सातत्याने लढा देत आलो आहोत. आता तुमची आम्हाला साथ हवी आहे. त्यामुळे आपण शहरातील फलकांचे कानडीकरण करावे. आतापर्यंत आम्ही 90 टक्के काम केले आहे. केवळ दहा टक्के काम शिल्लक आहे. ते काम आपल्या हातून व्हावे, असे सांगण्यात आले. आयुक्त कार्तिक एम. यांनी शहरातील फलकांबाबत कायदेशीर निर्णय घेण्यात येईल, असे सांगितले. शहरात मराठी फलक लावण्यात यावेत. दादागिरी करणाऱ्यांवर जशास तसे उत्तर देण्यात येईल, असा म. ए. समितीने इशारा दिला आहे. त्यामुळेच आज कन्नड संघटनांची वळवळ दिसून आली.
